ރާއްޖޭގައި މި އަހަރުގެ ނިޔަލަށް ހަތް ރިސޯޓެއް ހުޅުވާނެ ކަމަށް ޓުއަރިޒަމް މިނިސްޓަރު ތޯރިގު އިބްރާހިމް ވިދާޅުވެއްޖެ އެވެ.
ރައީސް އޮފީހުގައި ބޭއްވީ ނުސްވެރިންގެ ބައްދަލުވުމުގައި މައުލޫމާތު ދެމުން މިނިސްޓާ ތޯރިގު ވިދާޅުވީ މާކެޓަށް 1،000 އެނދު، އަލަށް ހުޅުވާ ހަތް ރިސޯޓާއެކު އިތުރުވާނެ ކަމަށެވެ. އޭގެ އިތުރަށް މިނިސްޓާ ވިދާޅުވީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން ޓޫރިޒަމުގެ ބޭނުމަށް 31 ތަނެއް ކުއްޔަށް ދޫކޮށްފައިވާ ކަމަށެވެ.
އަދި ރިސޯޓު މަދު އަތޮޅުތަކުގައި ރިސޯޓްތައް އިތުރުކުރުމަށްޓަކައި ޓޫރިޒަމްގެ ދާއިރާއިން ރަނގަޅު ލުއިތަކެއް މިހާރު ދީފައިވާނެ ކަމަށްވެސް މިނިސްޓާ ވިދާޅުވި އެވެ. އޭގެ ސަބަބުން ޓޫރިޒަމުގެ ފައިދާ އެންމެންނަށް ލިބޭނެ ގޮތް ހަމަޖެހޭނެ ކަމަށް ވެސް މިނިސްޓާ ވިދާޅުވި އެވެ.
"މި ސަރުކާރު އައި ފަހުން ކްލޯޒް ބިޑިންގެ ދަށުން ފަތުރުވެރިކަމަށް 16 ތަނެއް ވަނީ ކުއްޔަށް ދޫކުރެވިފައި. ކްރޮސް ސަބްސިޑީގެ ދަށުން ފަތުރުވެރިކަމަށް 11 ތަނެއް ވަނީ ކުއްޔަށް ދޫކުރެވިފައި. އަދި އޯޕަން ބިޑިންގެ ދަށުން 4 ތަނެއް ވަނީ ކުއްޔަށް ދޫކުރެވިފައި،" ޓުއަރިޒަމް މިނިސްޓަރު ވިދާޅުވި އެވެ.
މިވަގުތު ރާއްޖޭގައި 179 ރިސޯޓާއި 914 ގެސްޓްހައުސް އާއި 170 ސަފާރީ އުޅަނދު އަދި 16 ޓޫރިސްޓް ހޮޓާ އަންނަނީ ހިންގަމުންނެވެ. އެހެންކަމުން ރާއްޖޭގައި ޖުމްލަ ހުރީ 67،047 އެނދެވެ.
