ތެލަސީމިއާ ބަލިމީހުންނާއި އާއިލާތަކުން ތެލަސީމިއާ ސެންޓަރުގެ ޚިދުމަތްތަކާމެދު ކަންބޮޑުވުން ފާޅުކުރުމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހެނދުނު އެ ސެންޓަރަށް ޒިޔާރަތްކުރައްވައި، އެ ތަނުގައި މިވަގުތު ހުރި މައްސަލަތަކުގެ މައުލޫމާތު އޮޅުންފިލުއްވައިފިއެވެ. 

ރައީސް މުއިއްޒު މި ޒިޔާރަތުގައި ސެންޓަރުގެ މުވައްޒަފުންނާއި މިވަގުތު ފަރުވާ ހޯދަމުންދާ ބަލިމީހުންނާއި ބައްދަލުކުރައްވައި، އެ ފަރާތްތަކުގެ ކަންބޮޑުވުންތައް އަޑުއައްސަވައި އަދި ސެންޓަރުގައި ހުރި މައްސަލަތަކާއި ބެހޭގޮތުން ތަފްސީލީ މަޢުލޫމާތު ހޯއްދަވާފައި ވެއެވެ.

^{ލޭ އަޅާ ކުދިންގެ އާއިލާތަކާ ރައީސް ބައްދަލުކުރެއްވުން. / ފޮޓޯ: ރައީސް އޮފީސް}

ރައީސް އަރިހުގައި މި ޒިޔާރަތުގައި ހެލްތު މިނިސްޓަރު އަބްދުﷲ ނާޒިމް އިބްރާހިމާއި ފިނޭންސް މިނިސްޓަރު މޫސާ ޒަމީރު ވެސް ބައިވެރިވެވަޑައިގެންނެވިއެވެ. މިއީ މައްސަލަތައް ހައްލުކުރުމަށް ސަރުކާރުން ދެއްވާ އިސްކަމުގެ ހެއްކެކެވެ.

ރައީސް ވިދާޅުވީ، ތެލަސީމިއާ ބަލިމީހުންނަށް ދިމާވެފައިވާ ދަތިތަކަކީ ސަރުކާރުން ވަރަށް ބޮޑު ސަމާލުކަމެއް ދޭ ކަމެއް ކަމަށެވެ. “މި މައްސަލަތައް ހައްލުކުރުމަށް އަޅުގަނޑުމެން އަވަސް ފިޔަވަޅުތަކެއް އަޅާނަން. ތެލަސީމިއާ ބަލިމީހުންނަށް އެންމެ ރަނގަޅު ފެންވަރުގެ ފަރުވާ ލިބޭކަން ކަށަވަރުކުރުމަކީ ސަރުކާރުގެ އެންމެ އިސް އެއް އަމާޒު."

ތެލެސީމިއާ ބަލި ވާރުތަވާ މައްސަލަ ހައްލުކުރަން ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯގެ އެހީއަށް މިސަރުކާރުން ވަނީ އެދިފައެވެ.

ތެލެސީމިއާ ޕޭޝަންޓުންނަށް ފަރުވާ ދިނުމަށް ''ތެލެސީމިއާ ސެންޓަރު'' ގެ ނަމުގައި ހާއްސަ މަރުކަޒެއް ހުޅުވީ 1994 ވަނަ އަހަރުއެވެ. ތެލަސީމިއާ ޕޭޝަންޓުންނަށް ދެވޭ އެންމެ މުހިއްމު ފަރުވާއަކީ ލޭ އެޅުމާއި ހަށިގަނޑަށް އެތެރެވާ ދަނގަޑުގެ ބައި ބޭރުކުރުމާއި އަދި އިތުރުވުމުން ދިމާވާ އެކި އެކި ކޮމްޕްލިކޭޝަންތައް ކުޑަކުރުމެވެ. މިއީ ތެލެސީމިއާ ބަލި ޖެހިފައިވާ ފަރާތްތަކަށް ދާއިމީކޮށް ކުރަން ޖެހޭ ފަރުވާއެވެ. މާލޭގައި ދިރިއުޅޭ ތެލެސީމިއާ ޕޭޝަންޓުންނަށް ފަރުވާދެނީ ތެލެސީމިއާ ސެންޓަރުންނެވެ. އަތޮޅު ތެރޭގައި 108 ރަށުގައި ލޭ އެޅުމުގެ އިންތިޒާމު ވަނީ ހަމަޖެހިފައެވެ.

ތެލަސީމިއާ ކުދިން އެބަލިން ސަލާމަތްކުރުމަށް ސަރުކާރުން ދަނީ ހިލޭ ބޯންމެރޯ ހެދުމަށްވެސް އެކުދިންތައް ފޮނުވަމުންކަން ފާހަގަ ކުރެވެއެވެ.