ރައްޔިތުންނަށް ސާފު ފެން ފޯރުކޮށްދިނުމަކީ ސަރުކާރުން އިސްކަންދޭ އެއް ކަންތައް ކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

ދުނިޔޭގެ ފެނުގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައި ރައީސް ވަނީ ފެނުގެ ދުވަހުގެ ތަހުނިޔާ ހުރިހާ ދިވެހިންނާއި ބައިނަލްއަގްވާމީ ޕާޓްނަރުންނަށް އަރިސްކުރައްވާފައިވެއެވެ.

މިއަހަރުގެ ފެނުގެ ދުވަހުގެ ޝިޢާރަކީ "ގްލޭޝިޔާ ޕްރިޒަވޭޝަން" ކަން ރައީސް ފާހަގަކުރައްވާފައިވެއެވެ.

"މި ޝިޢާރުން ހަނދާންކޮށްދެނީ މޫސުމީ ބަދަލުތަކާއި ފެނުގެ ވަސީލަތްތަކުގެ މަދުކަމާއި އިންސާނުންގެ ނާޒުކުކަމާ އޮތް ގުޅުމުގެ މަތިންނެވެ. މިފަދަ ހައްސާސް މައްސަލަތަކާ ގުޅޭގޮތުން ވާހަކަދެއްކުމުގައި ރާއްޖެއިން ދެމިތިބޭނަމެވެ. ރައްޔިތުންނަށް ސާފު ފެން ފޯރުކޮށްދިނުމަކީ އަޅުގަނޑުމެންގެ އެންމެ އިސް އަމާޒުތަކުގެ ތެރެއިން އެކެކެވެ." ރައީސް ވިދާޅުވިއެވެ.

ރައީސްގެ ޕޯސްޓުގައި، ދެމެހެއްޓެނިވި މުސްތަޤުބަލެއް ބިނާކުރުމަށް މާނަހުރި ފިޔަވަޅުތަކެއް އެޅުމަށް އިލްތިމާސްކުރައްވާފައިވެއެވެ. މީގެ އިތުރުން، ދުނިޔެ ހޫނުވުމުގެ ސަބަބުން ދުނިޔޭގެ ދެ ތަނޑީގައިވާ ގަނޑުފެން ވިރި ކަނޑުތަކަށް އެޅުމުގެ ސަބަބުން ކަނޑުގެ ލޮނުގަނޑު އުފުލެމުންދާކަން ފާހަގަކުރައްވާފައިވެއެވެ.

ސައިންސްވެރިންގެ ދިރާސާތަކުން ދައްކާގޮތުގައި ދުނިޔެ ހޫނުވެ ގަނޑުފެނުގެ ބައްރަށް ފިނިހޫނުމިން މަތިވަމުންދާއިރު، އެކަމުގެ ސަބަބުން އަހަރަކު 0.6 މިލިމީޓަރަށް ކަނޑުގެ ލޮނުގަނޑު އުފުލެމުންދެއެވެ. މިކަމަކީ ކަންބޮޑުވާންޖެހޭ ހާލަތެއްގައި އޮތް މައްސަލައެއް ކަމަށް ސައިންސްވެރިން ވަނީ އިންޒާރުދީފައެވެ.