ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ދިވެހިރާއްޖޭގެ ޓޫރިޒަމާބެހޭ ޤާނޫނަށް އިޞްލާޙު ގެނައުމުގެ ބިލު ތަސްދީޤުކުރައްވައިފިއެވެ. މި ބިލަކީ، 19 މާރިޗު 2025 ވީ ބުދަ ދުވަހު ބޭއްވެވި 20 ވަނަ ރައްޔިތުންގެ މަޖިލީހުގެ 2025 ވަނަ އަހަރުގެ ފުރަތަމަ ދައުރުގެ 17 ވަނަ ޖަލްސާއިން ފާސްކުރެއްވި ބިލެކެވެ.

މި އިޞްލާޙުގެ މައިގަނޑު ބޭނުމަކީ ކްރޮސް ސަބްސިޑީގެ ގޮތުގައި ޓޫރިސްޓް ރިޒޯޓު ތަރައްޤީކުރުމަށް ރަށް ނުވަތަ ބިން ދޫކުރުމުގެ އުސޫލު އިޞްލާޙުކުރުމާއި، ރިޒޯޓުތަކުގެ ކުލީގެ މުއްދަތު އިތުރުކުރުމާގުޅޭ އުސޫލު ބަދަލުކުރުމެވެ. އަދި ޓޫރިޒަމްގެ ބޭނުމަށް ތަރައްޤީކޮށްފައިވާ ތަންތަން ރީ-ޑިވެލޮޕްކުރުމާބެހޭ އުސޫލުތަކާއި، އައު ޓޫރިޒަމް ޓްރަސްޓް ފަންޑެއް ޤާއިމުކުރުމާބެހޭ ކަންކަން ހިމެނެއެވެ. މިއާއެކު ކުރީގެ "ފަތުރުވެރިކަމުގެ ޞިނާޢަތުގެ ޓްރަސްޓް ފަންޑު" އުވި، އެ ފަންޑުގައިވާ ފައިސާ ޓޫރިޒަމް ޓްރަސްޓް ފަންޑަށް ބަދަލުވީކަމަށް ވެސް މި އިސްލާޙުގައި ބަޔާންކޮށްފައިވެއެވެ.

މި އިޞްލާޙުގެ ދަށުން;

1. މީހުން ދިރިއުޅޭ ރަށްރަށުގައި ޓޫރިޒަމްގެ ބޭނުމަށް ތަރައްޤީކުރެވޭ ބިން ކަނޑައަޅާނީ ރަށު/ސިޓީ ކައުންސިލުންނެވެ.
2. ފަޅުރަށްރަށާއި ފަޅުތައް ޓޫރިޒަމްގެ ބޭނުމަށް ކަނޑައަޅާނީ ރައީސުލްޖުމްހޫރިއްޔާއެވެ.
3. ރިޒޯޓުތަކުގެ ކުއްޔަށް ދޫކޮށްފައިވާ މުއްދަތު 49 އަހަރަށް އިތުރުކުރެވޭނެއެވެ.
4. ޓޫރިސްޓް ޚިދުމަތްދޭ ތަންތަނުގެ ސޭފްޓީ އަދި އޮޕަރޭޓިންގ ސްޓޭންޑަޑްސް ކަނޑައެޅޭނެއެވެ.
5. "ޓޫރިޒަމް ޓްރަސްޓް ފަންޑު" އުފެދި، ކުރީގެ ފަތުރުވެރިކަމުގެ ޞިނާޢަތުގެ ޓްރަސްޓް ފަންޑު އުވައިލެވޭނެއެވެ.

މީގެ އިތުރުން، ޤާނޫނަށް ޢަމަލުކުރަން ފަށާ ތާރީޚުން ފެށިގެން 1 (އެކެއް) އަހަރުދުވަހުގެ ތެރޭގައި، މި ޤާނޫނުގެ ދަށުން ޓޫރިޒަމާބެހޭ މިނިސްޓްރީން ކަނޑައަޅާ މިންގަނޑުތަކާ އެއްގޮތްވާ ގޮތުގެމަތިން، ޓޫރިސްޓް ޚިދުމަތްދޭ ތަންތަނުގައި، އެތަނެއްގެ އެކި ދާއިރާތަކުގެ ސޭފްޓީ އަދި އޮޕަރޭޓިންގް ސްޓޭންޑަރޑްސް ކަނޑައަޅާ ކޮމްޕަލަޔަންސް ކޯޑެއް އެކުލަވައިލަންވާނެ ކަމަށް އިސްލާޙުގައި ބުނެފައިވެއެވެ.

ރައީސުލްޖުމްހޫރިއްޔާ މި ބިލު ތަސްދީޤުކުރައްވައި، ދިވެހިސަރުކާރުގެ ގެޒެޓުގައި މިއަދު ޝާއިޢުކުރެއްވުމާއެކު، މި އިޞްލާޙަށް މިހާރު ވަނީ ޢަމަލުކުރަން ފަށާފައެވެ.