ދިވެހިރާއްޖެއިން ޑެންމާކަށް ކަނޑައަޅާ ނޮން-ރެސިޑެންޓް ސަފީރުކަމަށް ގީލާ އަލީ އައްޔަނުކުރުމަށް ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީން މިއަދު ފާސްކޮށްފިއެވެ.
މި މަޤާމަށް ގީލާ އައްޔަންކުރުމަށް ރުހުން ހޯދުމަށް އޭނާގެ ނަން ރައީސް ޑރ. މުޙައްމަދު މުޢިއްޒު އިއްޔެ މަޖިލީހަށް ފޮނުއްވިއެވެ. ގީލާއަކީ މިހާރުވެސް ކިންގްޑަމް އޮފް ބެލްޖިއަމްއަށް ރާއްޖެއިން ކަނޑައަޅުއްވާފައި ހުންނަވާ ސަފީރެވެ.
ކޮމިޓީން މިއަދު ބޭއްވި ބައްދަލުވުމުގައި ޑެންމާކަށް ދިވެހިރާއްޖެއިން ކަނޑައަޅާ ނޮން-ރެސިޑެންޓް ސަފީރުކަމަށް ގީލާ އައްޔަނުކުރުމާމެދު މެންބަރުން ދެކިވަޑައިގަންނަވާ ގޮތް ބެލުމަށް ވޯޓަށް އެހުމުން، ވޯޓު ދެއްވި މެންބަރުންގެ އިއްތިފާޤުން ނިންމީ އޭނާ އެ މަޤާމަށް އައްޔަނުކުރަން ފެންނަ ކަމަށެވެ.
