ރައްޔިތުންގެ އަޑު އަޑުއެއްސެވުމަށާއި، ރައްޔިތުންނާއި ގާތުން މުޢާމަލާތް ކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަޅުއްވަމުން ގެންދަވާ ފިޔަވަޅުތަކުގެ ތެރެއިން އަނެއްކާވެސް އިތުރު މުހިންމު ފިޔަވަޅެއް އަޅުއްވައިފިއެވެ. އެގޮތުން، "ރައީސްގެ ޖަވާބު" ސިލްސިލާގެ ދަށުން ރައްޔިތުންނަށް ވީޑިއޯ މެދުވެރިކޮށް ސުވާލު ހުށަހެޅުމުގެ ފުރުޞަތު ރައީސުލްޖުމްހޫރިއްޔާގެ އޮފީހުން މިއަދު ހުޅުވާލައްވައިފިއެވެ.

މި އައު އިނީޝިއޭޓިވްގެ ދަށުން، ރާއްޖޭގެ ކޮންމެ ރައްޔިތަކަށް ވެސް، ރާއްޖޭގެ ކޮންމެ ހިސާބެއްގައި ހުންނެވިކަމުގައި ވިޔަސް، ރައީސުލްޖުމްހޫރިއްޔާއަށް ސީދާ ސުވާލު ހުށަހެޅުމުގެ ފުރުޞަތު ލިބިވަޑައިގަންނަވާނެއެވެ. މިކަމަށްޓަކައި ޚާއްޞަކޮށްފައިވާ "ރައްޔިތުންގެ އަޑު" ޕޯޓަލް (https://citizensvoice.gov.mv) މެދުވެރިކޮށް ރައީސުލްޖުމްހޫރިއްޔާއާއި ސުވާލުކުރައްވަން ބޭނުންފުޅުވާ ރައްޔިތުން، ސުވާލު ރެކޯޑްކުރެއްވުމަށް ފަހު ހުށަހަޅުއްވާނީއެވެ.

ރައީސުލްޖުމްހޫރިއްޔާގެ އޮފީހުގެ ސްޕޯކްސްޕަރސަން ހީނާ ވަލީދު ވިދާޅުވީ، މިއީ ރައްޔިތުންނާއި ސަރުކާރާއި ދެމެދު އޮންނަ ގުޅުން އިތުރަށް ބަދަހިކޮށް، ރައްޔިތުންގެ ކަންބޮޑުވުންތަކަށް ސީދާ ރައީސުލްޖުމްހޫރިއްޔާ އަޑުއައްސަވައި ޖަވާބުދެއްވުމަށް އެޅުއްވި މުހިންމު ފިޔަވަޅެކެވެ.

"ރައީސްގެ ޖަވާބު" ސިލްސިލާއަކީ 2024 ވަނަ އަހަރުގެ ފެބްރުއަރީ މަހު ފެށުނު ޕްރޮގްރާމެކެވެ. މި ޕްރޮގްރާމްގެ މަޤްޞަދަކީ ރައްޔިތުންގެ ސުވާލުތަކަށް ސީދާ ރައީސުލްޖުމްހޫރިއްޔާ ޖަވާބުދެއްވުމެވެ. ކުރިން މި ޕްރޮގްރާމް ވަގުތީގޮތުން މެދުކަނޑާލެވިފައިވީނަމަވެސް، މިހާރު އަލުން ފަށައިގަނެވިފައި މިވަނީ އިތުރު ހަރުދަނާކަމަކާއެކު، ރާއްޖޭގެ ހުރިހާ ރައްޔިތުންނަށް ހަމަހަމަކަމާއެކު ސުވާލު ހުށަހެޅުމުގެ ފުރުޞަތު ދިނުމުގެ ގޮތުންނެވެ.

ރައްޔިތުންނަށް މި ފުރުޞަތު ލިބިވަޑައިގަތުމާއެކު، ގިނަ ބަޔަކު މިހާރުވެސް ވަނީ ސުވާލުތައް ހުށަހަޅުއްވަން ފައްޓަވާފައި ކަމަށް ޚަބަރު ލިބެއެވެ.