ސުޕްރީމް ކޯޓުގެ ދެ ފަނޑިޔާރަކު ވަކިކޮށް، ފަނޑިޔާރުންގެ ޖުމުލަ ޢަދަދު ހަތަކުން ފަހަކަށް ބަދަލުކުރުމަށް ޤާނޫނަށް ގެނައި އިޞްލާޙްގެ ބިލު އަނބުރާ މަޖިލީހަށް ފޮނުވާލުމާއި ގުޅިގެން، އެ ބިލު އިތުރަށް އިޞްލާހް ކުރުމަށް މަޖިލީހުގެ ޖުޑިޝަރީ ކޮމިޓީއަށް ފޮނުވަން މިއަދު ފާސްކޮށްފިއެވެ.

މި ބިލް އިޞްލާހް ކުރެއްވުމަށް އަލުން ނިންމަން ޖެހުނު ސަބަބަކީ، ކުރިން މަޖިލީހުން އެ ބިލް ފާސްކޮށްފައި ތަޞްދީޤް ކުރެއްވުމަށް ރައީސުލްޖުމްހޫރިއްޔާގެ އޮފީހަށް ފޮނުއްވުމުން އޭރުގައި އެއޮތް ގޮތަށް އެ ބިލް ތަޞްދީޤު ކުރައްވަން އެމަނިކުފާނު ބޭނުންވުޅުވެވަޑައިނުގެންނެވުމުންނެވެ.

މި ބިލު މަޖިލީހަށް ހުށަހެޅުއްވީ ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު، އަމިއްލަ ހައިސިއްޔަތުންނެވެ. މިދިޔަ މަހުގެ 26 ވަނަ ދުވަހު މަޖިލީހުން ފާސްކުރި ބިލު އަނބުރާ މަޖިލީހަށް ފޮނުއްވީ ބަންޑާރަ ނައިބު އަހުމަދު އުޝާމް އެއީ ގާނޫނުއަސާސީއާ ފުށުއަރާ ބިލެއް ކަމަށް ރައީސަށް ލަފާ ދެއްވުމާއި ގުޅިގެންނެވެ.

މިއަދުގެ މަޖިލިސް ޖަލްސާގައި ބިލާމެދު އަލުން ވިސްނުމަށް އެދި ރައީސް ޑރ. މުޢިއްޒު ފޮނުއްވި ސިޓީ ރިޔާސަތުން އިއްވުމަށްފަހު، އެ ބިލު އިޞްލާޙް ކުރުމަށް ޖުޑިޝަރީ ކޮމިޓީއަށް ފޮނުވުމާއި ގުޅޭ ގޮތުން ނެގުނު ވޯޓުގައި ފެންނަކަމަށް ވޯޓު ދެއްވީ 50 މެންބަރުންނެވެ. ނުފެންނަ ކަމަށް ވޯޓު ދެއްވީ 7 މެންބަރުންނެވެ.