އެމެރިކާގެ ރައީސް ޑޮނަލްޑް ޓްރަމްޕް އަދި ޓެކްނޮލޮޖީ ބިލިއަނަރު އެލޮން މަސްކް ބައިވެރިވެ ވައިޓް ހައުސްގައި ބޭއްވި ޓެސްލާ ޕްރޮމޯޝަން އިވެންޓަކީ ފެޑެރަލް އެތިކްސް ޤާނޫނުތަކާއި ޚިލާފު ކަމެއް ކަމަށް ބުނެ، އެމެރިކާގެ ސެނެޓަރުން އެކަން ތަޙްޤީޤު ކުރުމަށް ގޮވައިލައިފިއެވެ.
މިކަމާއި ގުޅިގެން، ސެނެޓްގެ ބައެއް މެންބަރުންތައް ވަނީ އެމެރިކާގެ ގަވަރމަންޓް އެތިކްސް އޮފީހުގެ އެކްޓިންގ ޑިރެކްޓަރަށް ސިޓީއެއް ފޮނުވައި، މި އިވެންޓަކީ ފެޑެރަލް އެތިކްސް ޤާނޫނުތަކާއި ޚިލާފު ކަމެއް ކަމަށް ބުނެފައެވެ.
ސެނެޓަރުން ބުނެފައިވަނީ ސަރުކާރުގެ މަޤާމުތައް ނަހަމަ ގޮތުގައި ބޭނުންކުރުމާއި ގުޅޭ އެތިކްސް ޤާނޫނުތައް ތަންފީޒުކުރަން ޖެހޭ ކަމަށެވެ.
ރައީސް ޓްރަމްޕް ވަނީ ވައިޓް ހައުސްގައި އޮތް އިވެންޓެއްގައި ބްރޭންޑް ނިއު ޓެސްލާ ކާރެއް ތިމަންނާ ވެސް ގަންނާނެ ކަމަށް ވިދާޅުވެ އޭނާގެ އެޑްވައިޒަރު އެލޮން މަސްކުގެ ވިޔަފާރި ޕްރޮމޯޓް ކޮށްފައެވެ.
ޓްރަމްޕް އާއި އެލޮން މަސްކް: ޚަބަރުތައް ބުނާ ގޮތުގައި މިއީ ޓެސްލާގެ ވެރިޔާ އަދި ސަރުކާރުގެ ޑިޕާޓްމަންޓް އޮފް ގަވަރމަންޓް އެފިޝެންސީ (ޑޯޖް)ގެ އިސްވެރިޔާ އެލޮން މަސްކަށް ދެއްކި އެއްބާރުލުމެއް ކަމަށް ބެލެވެއެވެ
ސެނެޓަރުން ބުނެފައިވާ ގޮތުގައި ޓްރަމްޕް އަދި މަސްކް ވަނީ ވައިޓް ހައުސް "ވަގުތީ ޓެސްލާ ޝޯރޫމަކަށް" ބަދަލުކޮށްފައެވެ. އަދި މަސްކް ވަނީ އޭނާގެ ސަރުކާރުގެ މަޤާމާއި ރައީސްގެ ބާރު ބޭނުންކޮށްގެން ޓެސްލާ ޕްރޮމޯޓްކޮށް، ޓްރަމްޕްގެ ސަރުކާރުން ޓެސްލާއަށް ތާއީދުކުރާކަން ދޭހަވާ ގޮތަށް ޢަމަލުކޮށްފައި ކަމަށް ސެނެޓަރުން ތުހުމަތުކޮށްފައިވެއެވެ.
މި މައްސަލައިގައި ތަޙްޤީޤެއް ހިންގުމަށް ސެނެޓަރުން ގޮވާލާފައިވާއިރު، ވައިޓް ހައުސްއިން އަދި މިކަމާއި ގުޅޭ ގޮތުން އިތުރު ބަޔާނެއް ދީފައެއް ނުވެއެވެ.
