ހާފިޒުންނަށް ދޭ ސަނަދު މޯލްޑިވްސް ކޮލިފިކޭޝަންސް އޮތޯރިޓީ (އެމްކިޔުއޭ) އިން ގަބޫލުކުރާ މިންގަނޑަށް މިއަދު ބަދަލުކޮށްފި އެވެ.
އެމްކިއުއޭ އިން ކުރި އިއުލާނެއްގައި ބުނީ ރާއްޖޭގެ ގައުމީ ސަނަދުތަކުގެ އޮނިގަނޑުގެ ލެވެލް ހަތަރެއް (އެޑްވާންސްޑް ސެޓްފިކެޓް)އެއްގެ ގޮތުގައި ހާފިޒުކަމުގެ ސަނަދު ބަލައިގަތުމަށް މިހާރު ނިންމާފައިވާ ކަމަށެވެ.
ހާފިޒުކަމުގެ ސަނަދު ލެވަލް ހަތަރެއްގެ ސަނަދެއް ގޮތުގައި ބަލައިގަންނާނީ ލޯވާ ސެކަންޑަރީ ސެޓްފިކެޓް ފުރިހަމަކޮށްފައިވުމާ އެކު، މޯލްޑިވްސް ނޭޝަނަލް ކޮލިފިކޭޝަންސް ފްރޭމްވޯކް (އެމްއެންކިއުއެފް) ލެވެލް ތިނެއްގެ ކޮލިފިކޭޝަނެއް ހާސިލުކޮށްފައި ވާނަމަ ކަމަށް އެ އިއުލާނުގައި ބުންޏެވެ.
Advertisement
އުމުރުން 18 އަހަރުވެ، އެއް އަހަރު ދުވަހުގެ މަސައްކަތު ތަޖުރިބާ ލިބިފައިވުމާއި އެކު، އެމްއެންކިއުއެފް ލެވެލް ތިނެއްގެ ކޮލިފިކޭޝަނެއް ހާސިލުކޮށްފައިވާން ޖެހޭ ކަމަށް ވެސް ބުންޏެވެ.
އެ އިއުލާނުގައި ބުނީ ހާފިޒުކަމުގެ ސަނަދު ގިންތި ކުރުމަށް ހުށަހަޅާނީ، ސަނަދު ވެލިޑޭޓް ކުރުމަށް ހުށަހަޅާ ފޯމުގެ ޒަރީއާ އިން އެ ފޯމުގައި ބަޔާންކޮށްފައިވާ ލިޔެކިޔުންތަކާއި އެކުގައި ކަމަށެވެ.
ރާއްޖޭގައި ހާފިޒުންނަށް ސަނަދު ހަވާލުކުރުމުގެ ޒިންމާ މަތިވެފައި އޮންނަނީ އިސްލާމިކް މިނިސްޓްރީގެ ދަށުން ހިންގާ ކީރިތި ގުރުއާނާއި ބެހޭ ގައުމީ މަރުކަޒަށެވެ.
ކީރިތި ގުރުއާނާއި ބެހޭ ގައުމީ މަރުކަޒުގައި ރަޖިސްޓަރީކޮށްގެން ހިންގާ ގުރުއާން ހިތުދަސްކޮށްދޭ ކުލާހެއްގެ ދަރިވަރަކު ހާފިޒުކަމުގެ އިމްތިހާނު ހެދުމަށް އެދި އެ މަރުކަޒުން ކަނޑައަޅާފައިވާ ކޮމިޓީއަށް ހުށަހެޅުމުން، އެ ދަރިވަރަކު އިމްތިހާނު ކޮށްދެ އެވެ. އަދި އިމްތިހާނަށް ފަހު ހާފިޒުކަމުގެ ސަނަދު ދެ އެވެ.
ރާއްޖޭގައި ގުރުއާން ހިތުދަސްކުރާ މީހުންގެ އަދަދު އަހަރެއް އަހަރަކަށް އަންނަނީ ވަރަށް ބޮޑަށް އިތުރުވަމުންނެވެ.
