މަތީ ތައުލީމާއި ތަމްރީނުގެ ގާނޫނުގެ ދަށުން މަތީ ތައުލީމާއި ތަމްރީނު ދޭ 101 މަރުކަޒަކުން ރީ-ރަޖިސްޓްރީކޮށްފައި ނުވާތީ، އެ ތަންތަނުން ހިންގާ ކޯސްތަކާއި ސަނަދުތައް ބަލައިނުގަތުމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ނިންމައިފި އެވެ.

އެމްކިއުއޭ އިން މިއަދު ކުރި އިއުލާނެއްގައި ބުނީ މަތީ ތައުލީމާއި ތަމްރީނުގެ ދޭ ގާނޫނުގެ ދަށުން އެ ހިދުމަތްދޭ މަރުކަޒުތައް ހިންގޭނީ ހަޔާ އެޑިއުކޭޝަން މިނިސްޓްރީގައި ރަޖިސްޓްރީވުމަށް ފަހު ކަމަށެވެ. އެކަމަކު މިއަދާ ހަމައަށް 101 ތަނަކުން ރީ-ރަޖިސްޓްރީކޮށްފައި ނުވާތީ އެ ތަންތަނުގެ ލިސްޓެއް މިނިސްޓްރީން އެމްކިއުއޭ އަށް ފޮނުވާފައިވާ ކަމަށް ވެސް އެ އޮތޯރިޓީން ބުންޏެވެ.

އެހެންވެ، އެ ކޮލެޖުތަކާއި އިންސްޓިޓިއުޓްތަކުން ރީ-ރަޖިސްޓްރީވެފައި ނުވާތީ، އެތަންތަނަށް ކުރިން ހުއްދަ ދިން ޕްރޮގްރާމުތަކުގެ ހުއްދަ ގަބޫލުނުކުރާނެ ކަމަށް އެމްކިއުއޭ އިން ބުންޏެވެ.

އެ ޕްރޮގްރާމުތަކުގެ ހުއްދަ މިއަދުން ފެށިގެން ގަބޫލު ނުކުރިޔަސް، އެ ޕްރޮގްރާމުތަކުން ކިޔަވާފައިވާ އަދި އެމްކިއުއޭ އަށް މިހާތަނަށް ބެޗް އޮޑިޓަށް ފޮނުވާފައިވާ ދަރިވަރުންގެ ސަނަދުތައް ގަބޫލުކުރާނެ ކަމަށް އެމްކިއުއޭ އިން ބުންޏެވެ.

އެ އިއުލާނާއި އެކު އެމްކިއުއޭއިން ވަނީ ސަނަދުތައް ގަބޫލުނުކުރަން ނިންމި 101 މަރުކަޒުގެ ލިސްޓެއް ވެސް އާންމުކޮށްފަ އެވެ. އޭގެ ތެރޭގައި ހިމެނެނީ ޑައިވިން އިންސްޓިޓިއުޓްތަކާއި ގުރުއާން ކްލާސްތަކާއި ދިވެހި ކެބިން ކްރޫ އެކަޑަމީ އާއި ގްލޯނެޓް އަދި ކައްކާ ކޯސްތަކާއި އެކި ކަހަލަ ތަމްރީނުދޭ މަރުކަޒުތަކެވެ.