މަތީ ތަޢުލީމު ދިނުމަށް އަމިއްލަ ފަރާތްތަކުން ހިންގާ ތަންތަނުގައި ދޭ މަތީ ތަޢުލީމުގެ ފެންވަރު ކަށަވަރު ކުރާނެކަމުގެ ޔަގީންކަން، ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް މިނިސްޓަރ ޑރ. އަލީ ހައިދަރު ދެއްވައިފިއެވެ.

މިނިސްޓަރ ހައިދަރު މިފަދައިން ވިދާޅުވި، "އަހާ" ފޯރަމްގައި ބައިވެރިވެ ވަޑައިގެން، އާންމު ފަރާތަކުން ކުރެއްވި ސުވާލަކަށް ޖަވާބު ދެއްވަމުންނެވެ. މިނިސްޓަރ ވިދާޅުވީ، އެމަނިކުފާނުގެ މިނިސްޓްރީގެ އެންމެ މުހިންމު އެއް މަސްއޫލިއްޔަތަކީ ރާއްޖޭގައި ދެވޭ މަތީ ތަޢުލީމަކީ ފެންވަރު ރަނގަޅު، ރައްޔިތުންނަށް އިތުބާރުކުރެވޭ މިންގަނޑަކަށް ފެތޭ ތަޢުލީމެއްކަން ކަށަވަރުކުރުން ކަމަށެވެ.

"އެންމެ ބޮޑު އެއްކަމަކަށް އަޅުގަނޑުމެން މިނިސްޓްރީން ކުރާ ކަމަކީ، ދިވެހިރާއްޖޭގައި މަތީ ތަޢުލީމު ދޭ ހުރިހާ އިންސްޓިޓިއުޓް ތަކެއްގައި ކިޔަވައިދިނުމުގެ ފެންވަރާއި، ސަރުކާރުން ކަނޑައަޅާ ކޮލިފިކޭޝަން ފްރޭމްވޯކުގެ ތެރެއިން ކަންކަން ފެތިގެން ކުރިއަށްދާކަން ބެލުން،" މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ، މަތީ ތަޢުލީމުގެ ފެންވަރު ކަށަވަރު ކުރުމަށް މިނިސްޓްރީން ކުރާ އެންމެ މުހިންމު މަސައްކަތަކީ ރާއްޖޭގައި މަތީ ތަޢުލީމު ފޯރުކޮށްދޭ އިދާރާތަކާއި މުއައްސަސާ ތަކުން މަތީ ތަޢުލީމު ފޯރުކޮށް ދެމުންދަނީ އަދި އެތަންތަނުގެ ކިޔަވައިދިނުމުގެ ފެންވަރު ހުރީ، ދިވެހިރާއްޖޭގައި ކަނޑައެޅިފައިވާ ކޮލިފިކޭޝަން އޮނިގަނޑަށް ފެތޭ ގޮތަށްކަން ކަށަވަރު ކުރުން ކަމަށެވެ. މިގޮތުން، ކޯހެއް ފެށުމުގެ ކުރިންނާއި ކޯހެއް ނިމުމަށްފަހު ވެސް އެ ކޯހެއްގައި ކިޔަވައިދިނުމާއި ކޯހުގެ އެހެނިހެން ކަންކަން ކޮލިފިކޭޝަން އޮތޯރިޓީން ކަނޑައަޅާފައިވާ މިންގަނޑުގެ ތެރެއިން ކުރިއަށް ދިޔަކަން ކަށަވަރު ކުރެއްވުމުގެ މަސައްކަތް މޯލްޑިވްސް ކޮލިފިކޭޝަން އޮތޯރިޓީން ކުރާނެ ކަމަށް މިނިސްޓަރ ފާހަގަކުރެއްވިއެވެ.

މިނިސްޓަރ އިތުރަށް ވިދާޅުވީ، މި މަސައްކަތުގައި ބައެއް ގޮންޖެހުންތައް ހުރި ނަމަވެސް، އެ ގޮންޖެހުންތަކުން އަރައިގަނެ، ކުރިއަށް އޮތް ތަނުގައި ރައްޔިތުންނަށް ޔަގީންކަން ދެއްވާނެ ކަމަށެވެ. ޚާއްޞަކޮށް އަމިއްލަ ކޮލެޖުތަކާއި އިންސްޓިޓިއުޓް ތަކުގައި ކިޔަވައިދެނީ ކަނޑައަޅާފައި ހުރި މިންގަނޑުތަކަށް، ކޮލިފިކޭޝަން ފްރޭމްވޯކްގެ ތެރެއިންކަން ޔަޤީން ކުރުމަށް މަސައްކަތް ކުރައްވާނެ ކަމަށް މިނިސްޓަރ ވިދާޅުވިއެވެ.

"އެހެންނަމަވެސް މިކަންތައް ޔަޤީންކުރުމުގައި އަޅުގަނޑުމެންނަށް އެބަހުރި ބައެއްކަހަލަ ގޮންޖެހުންތައް. އެހެންނަމަވެސް އެގޮންޖެހުންތަކުން އަރައިގަނެގެން އަޅުގަނޑުމެން އިރާދަކުރެއްވިއްޔާ ކުރިއަށް އޮތް ތާނގައި ވަރަށް ބޮޑަށް ރައްޔިތުންނަށް ޔަޤީންކަން އަރުވަން، ވަކިން ޚާއްޞަކޮށް އަމިއްލަ ކޮލެޖުތަކާއި އިންސްޓިޓިއުޓްތަކުގައި ކިޔަވައިދެނީ ކަނޑައަޅާފައި ހުރި މިންގަނޑުތަކަށް، ކޮލިފިކޭޝަން ފްރޭމްވޯކްގެ ތެރެއިންކަން ޔަޤީންކުރުމަށް،" މިނިސްޓަރު ވިދާޅުވިއެވެ.

މިނިސްޓަރ އިތުރަށް ފާހަގަކުރެއްވި ގޮތުގައި، ކޯސްތަކުގެ ފެންވަރު ކަށަވަރުކުރުމުގައި ބައެއް ގޮންޖެހުންތައް ހުރި ނަމަވެސް، ރާއްޖޭގެ އަމިއްލަ ކޮލެޖުތަކާއި މަތީ ތަޢުލީމު ދޭ މުއައްސަސާތަކުން ފޯރުކޮށްދޭ ތަޢުލީމަކީ ރައްޔިތުން އިތުބާރުކުރާ، ބަލައިގަންނަ މިންގަނޑަކަށް ފެތޭ ތަޢުލީމެއްކަން ކަށަވަރު ކުރެއްވުމުގެ މަސައްކަތް ހަލުވިކަމާއެކު ކުރައްވާނެ ކަމުގެ ޔަގީންކަން ދެއްވިއެވެ.