ބޭރު ގައުމުތަކުގައި މަތީ ތައުލީމު ހާސިލުކުރަމުންދާ ދަރިވަރުންނަށް ދެވޭ ސްޓައިޕެންޑް ނުވަތަ އިނާޔަތްތައް އަލުން މުރާޖައާކުރުމުގެ މަސައްކަތް ފަށާފައިވާ ކަމަށް ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދު ވިދާޅުވެއްޖެ އެވެ.

ރައީސުލްޖުމްހޫރިއްޔާގެ އޮފީހުން ކުރިއަށްގެންދާ "ތަރުޖަމާނާ އެކު" ޕްރޮގްރާމުގައި ވާހަކަދައްކަވަމުން މިނިސްޓަރު ހައިދަރު ވިދާޅުވީ، ރާއްޖެއިން ބޭރުގައި ސަރުކާރުގެ އެކި ސްކީމުތަކުގެ ދަށުން މަތީ ތައުލީމު ހާސިލްކުރާ ދަރިވަރުންނަށް ލިބެންޖެހޭ ފައިސާ ނުލިބޭކަމުގެ ޝަކުވާތައް އެ މިނިސްޓްރީއަށް ވެސް ލިބޭ ކަމަށެވެ. އަދި ފައިސާ ޖަމާވުން ލަސްވަނީ ބައެއް ފަހަރު ދަރިވަރުންގެ މައުލޫމާތާއި ލިޔެކިޔުންތައް ކަށަވަރުކުރުމަށް ވަގުތު ބޭނުންވާތީ ކަމަށް މިނިސްޓަރު ފާހަގަކުރެއްވިއެވެ. އެހެންކަމުން، ބޭނުންވާ ލިޔުންތައް ދުރާލާ ހުށަހެޅުމުން އެފަދަ ދަތިތައް ނުޖެހި އަވަހަށް ފައިސާ ލިބޭނެ ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ފައިސާ ނުލިބުމުގެ ޝަކުވާތައް ލިބުނު ނަމަވެސް މިދިޔަ ހަތަރު އަހަރުގެ ތަފާސްހިސާބަށް ބަލާއިރު، މިހާރު ދަރިވަރުންނަށް ފައިސާ ދޫކުރަން ޖެހޭ މުއްދަތުގައި ފައިސާ ދޫކުރެވޭ މިންވަރު %75 އަށް ވުރެ މަދުވާނެ ކަމަށެވެ. އަދި ފައިސާ ދޫކުރުމުގައި މާލިއްޔަތު ގަވާއިދަށް ފުރިހަމައަށް ބޯ ލަނބަންޖެހޭތީ، ހުރިހާ ލިޔެކިޔުމެއް ފުރިހަމަވުމަކީ މަޖުބޫރު ކަމެއްކަން މިނިސްޓަރު ފާހަގަކުރެއްވި އެވެ.

މިނިސްޓަރު ވިދާޅުވީ ފައިސާ ދޫކުރުމުގައި ބައެއް ފަހަރު ގައުމުތަކަށް ކަނޑައަޅާފައިވާ ސްޓައިޕެންޑުން ނުފުދޭ މައްސަލަވެސް ދިމާވާ ކަމަށެވެ. އެފަދަ މައްސަލަތައް ދިމާވަނީ، ވަކި ގައުމަކަށް ކަނޑައަޅާފައި ހުންނަ ސްޓައިޕެންޑް ރޭޓަށް އެހެން ގައުމެއްގައި ދަރިވަރު އުޅެން ޖެހުމުން ކަމަށް ވިދާޅުވި އެވެ. ސަރުކާރުން މިހާރު ސްޓައިޕެންޑް ރޭޓުތައް ކަނޑައަޅާފައިވަނީ ވަކި އަދަދުތަކަކަށް ކަމަށް ވިދާޅުވި އެވެ.

ހައިދަރު ވިދާޅުވީ މި މައްސަލައަށް ދާއިމީ ޙައްލެއް ހޯދުމުގެ ގޮތުން، ފާއިތުވި ހަތް އަހަރު ދުވަހުގެ ތެރޭގައި ބަދަލެއް ގެނެސްފައިނުވާ ސްޓައިޕެންޑް ރޭޓުތައް މުރާޖައާކުރުމުގެ މަސައްކަތް މިހާރު ސަރުކާރުން ކުރަމުންދާ ކަމަށެވެ.

"ސްޓައިޕެންޑުގެ މައްސަލާގައި ސްޓައިޕެންޑުތައް މުރާޖައާ ކުރަން އެބަ ފަށަން. އެއީ ގާތްގަނޑަކަށް 7 އަހަރު ވެއްޖެ ކަންނޭނގެ އެއް ސްޓައިޕެންޑެއް ބޭނުންކުރާތާ. އެހެން ނަމަވެސް ދިރިއުޅުމުގެ ހަރަދުތައް ކޮންމެ ގައުމެއްގައި ވެސް އަންނަނީ އިތުރުވަމުން،" ހައިދަރު ވިދާޅުވި އެވެ.

ސްޓައިޕެންޑު މުރާޖައާ ކުރުމުން އެ ގައުމެއްގައި ދިރިއުޅުމަށް އެކަށޭނަ އަދަދަކަށް ފައިސާ ދޫކުރެވޭނެ ކަމަށް ހައިދަރު ވިދާޅުވި އެވެ.