މާލެ އާއި ހުޅުލެ އާއި ދެމެދު އަޅާފައިވާ ސިނަމާލެ ބްރިޖު މަތިން ރޭ ފަތިހު މޫދަށް ފުންމާލި މީހަކު ފުލުހުން ސަލާމަތްކޮށްފިއެވެ.

މި ހާދިސާ ހިނގި ވަގުތު އެތަނުގައި ޑިއުޓީގައި ތިބި ޓްރެފިކް ފުލުހުންގެ ދެ އޮފިސަރުން ވަނީ އެ މީހާ ސަލާމަތްކުރުމަށް ޔުނީފޯމާއެކު މޫދަށް ފުންމާލައި އެމީހާ ސަލާމަތް ކޮށްފައެވެ.

މި މަންޒަރު ފެންނަ ވީޑިއޯއެއް މިހާރު ސޯޝަލްމީޑިއާގައި ދައުރުވަމުން ދެއެވެ.

މި ނޫހަށް މައުލޫމާތު ދިން ފަރާތަކުން ބުނި ގޮތުގައި އެ މީހާ ބްރިޖުން މޫދަށް ފުންމާލީ ފަތިހުގެ ވަގުތެއްގައެވެ. ނަމަވެސް މި ހާދިސާއާ ގުޅޭ އިތުރު މައުލޫމާތެއް މޯލްޑިވްސް ޕޮލިސް ސަރވިސްއިން ރަސްމީކޮށް ހާމަކޮށްފައެއް ނުވެއެވެ.

މޫދަށް ފުންމާލި މީހާއަކީ ދިވެއްސެއްކަން ނުވަތަ ބިދޭސީއެއްކަން ވެސް އަދި ކަށަވަރު ނުވެއެވެ.