ސުޕްރީމް ކޯޓުގެ ކުރީގެ ފަނޑިޔާރު ޙުސްނުއްސުޢޫދު ފަނޑިޔާރުކަމުގައި ގެންގުޅުއްވީ ސިޔާސީ އެކްޓިވިޒަމްގެ އުސޫލުތައްކަން ސާފުވެއްޖެކަމަށް ޕީއެންސީން ބުނެފިއެވެ.

ޕީއެންސީން ނެރުނު ބަޔާނެއްގައި ބުނެފައިވަނީ، ފަނޑިޔާރު ސުޢޫދު އިސްތިޢުފާ ދެއްވުމަށް ޖުޑީޝަލް ސަރވިސް ކޮމިޝަނަށް ހުށަހަޅަންޖެހޭ ސިޓީ ރައީސުލްޖުމްހޫރިއްޔާގެ އޮފީހަށް ހުށަހަޅާފައިވަނީ ރައީސުލްޖުމްހޫރިއްޔާގެ އިސްތަށިފުޅުގައި އަސްލެއްނެތް ތުހުމަތުތަކެއް އެޅުއްވުމަށް ކަމަށެވެ. މިއީ ފަނޑިޔާރު ސުޢޫދު ސިޔާސީ ވާދަވެރިކަމުގެ ތެރެއަށް ވަދެވަޑައިގެން ހުންނެވިކަމުގެ ހެއްކެއް ކަމަށް ޕީއެންސީން ދެކޭ ކަމަށް އެ ޕާޓީން ބުންޏެވެ.

އެގޮތުން، ފަނޑިޔާރުންނާ މެދު ޢަމަލުކުރެވެމުންދަނީ ޤާނޫނުއަސާސީއާއި ޤާނޫނުތަކުގައި ކަނޑައަޅާފައިވާ އުސޫލުތަކުގެ ތެރެއިން ކަމަށް ޕީއެންސީން ފާޙަގަކުރިއެވެ. އަދި ފަނޑިޔާރަކާމެދު ޖިނާއީ ތަޙުޤީޤެއް ފެށުމުން އެ ފަނޑިޔާރަކު ވަގުތީގޮތުން މަސައްކަތުން ދުރުކުރުމާމެދު ގޮތެއް ނިންމުމަކީ 2019 ވަނަ އަހަރު ޖުޑީޝަލް ސަރވިސް ކޮމިޝަނުގެ ޤާނޫނަށް ގެނެވުނު އިސްލާޙުގައި ބަޔާންކުރާ އިޖުރާއާތެއް ކަމަށް ވެސް އެ ޕާޓީން ބުންޏެވެ.

ދިވެހިރާއްޖޭގެ ޤާނޫނުއަސާސީއާއި ޤާނޫނުތައް ނެގެހެއްޓެވުމުގައި، އަދި މި ނިޒާމު ހިނގަންޖެހޭ ގޮތަށް ހިނގަމުންދާކަން ކަށަވަރުކުރެއްވުމުގައި ރައީސުލްޖުމްހޫރިއްޔާ އަދި އެ ޕާޓީގެ ރައީސް ޑރ. މުޙައްމަދު މުޢިއްޒު ދައްކަވަމުންދާ ނަމޫނާއަށް ޕީއެންސީން މަރުޙަބާ ދަންނަވައި ޝުކުރު އަދާކޮށްފައި ވެއެވެ.

ޕީއެންސީން ބުނީ، ތިން ބާރުގެ ތެރެއިން ޝަރުޢީ ބާރަކީ ސިޔާސީ ކަންކަމާއި ދުރުން، ރައްޔިތުންގެ ޙައްޤުތައް ކަށަވަރުކޮށްދީ، ޢަދުލު އިންސާފު ޤާއިމުކޮށްދިނުމުގެ މަތިވެރި ޒިންމާ ޙަވާލުވެފައިވާ ބާރުކަމަށްވާއިރު، އެ ބާރަށް އޮންނަ އިތުބާރުގެ އެއް އަސާސަކީ ސިޔާސީ ކަންކަމުގެ ތެރެއަށް ޝަރުޢީ ބާރުން ނުވަނުން ކަމަށެވެ.

އެގޮތުން ޕީއެންސީން ވަނީ ފަނޑިޔާރުން ސިޔާސީ ކަންކަމުގައި ބައިވެރިވުމާމެދު ކަންބޮޑުވުން ފާޅުކޮށް، ރައީސުލްޖުމްހޫރިއްޔާގެ އިދާރާއިން މިނިވަން މުއައްސަސާތަކަށް ދެއްވާ އެއްބާރުލެއްވުމަށް ތާއީދުކޮށްފައެވެ.