މަސްތުވާތަކެތީގެ ނެޓްވޯކްތަކުގެ ފަހަތުގައި ތިބެގެން އެ ވިޔަފާރިއަށް މާލީ ގޮތުން އެހީތެރިކަން ފޯރުކޮށްދޭ މީހުންނަށް 25 އަހަރުގެ ޖަލު ހުކުމެއް އަންނާނެހެންނާއި، އެފަދަ ފަރާތްތަކުން ހޯދާފައިވާ ހުރިހާ މުދަލަކާއި ފައިސާއެއް ދައުލަތަށް ނެގޭނެ ގޮތަށް ގާނޫނަށް ބޮޑެތި ބަދަލުތަކެއް ގެނައުމަކީ މި ވަނާ ހުއްޓުވުމަށް މި ސަރުކާރުން އެޅި ވަރަށް މުހިއްމު ފިޔަވަޅެއް ކަމުގައި ކަން ހޯމް މިނިސްޓަރު އަލީ އިހްސާން ވިދާޅުވެއްޖެއެވެ. އިހްސާން މިހެން ވިދާޅުވީ ޕީއެންސީ ކޮންގްރެސްގައި ވާހަކަފުޅު ދައްކަވަމުންނެވެ.
މަސްތުވާތަކެތީގެ ވިޔަފާރި ފަންޑުކުރުމާއި، އެކަމަށް އެހީތެރިވުން ޖިނާއީ ބޮޑު ކުށަކަށް ހަދައި، އަދަބުތައް ވަރުގަދަކުރީ 3 ޑިސެމްބަރު 2025 ގައި ރައްޔިތުންގެ މަޖިލީހުން ފާސްކޮށް، މާރިޗު 2026 ގައި ޢަމަލުކުރަން ފެށި މަސްތުވާތަކެތީގެ ޤާނޫނުގެ 3 ވަނަ އިޞްލާޙުގެ ދަށުންނެވެ.
މިނިސްޓަރު އިޙްސާން ވިދާޅުވި ގޮތުގައި މަސްތުވާތަކެތީގެ ވަބާ މުޅިން ނައްތާލެވޭނީ މި ވިޔަފާރީގެ ފަހަތުގައި ތިބެގެން ބޮޑެތި ފައިދާތައް ހޯދަމުންދާ "މާލީ މަދަދުގާރުން" ނުވަތަ ފައިނާންސްކުރާ ފަރާތްތަކަށް ހަރުކަށި ފިޔަވަޅުތަކެއް އަޅައިގެންނެވެ. ގާނޫނަށް ގެނެވުނު މި ބަދަލާއެކު، މަސްތުވާތަކެތީގެ ވިޔަފާރިން ހޯދާފައިވާ ކޮންމެ މުދަލަކާއި ފައިސާއެއް ދައުލަތަށް ނެގުމުގެ ފުރިހަމަ ބާރު ސަރުކާރަށް ލިބިގެންދާނެއެވެ.
Advertisement
މީގެ އިތުރުން ފާއިތުވި ތިން އަހަރު ދުވަހުގެ ތެރޭގައި ފުލުހުން ވަނީ ހާއްސަ 508 އޮޕަރޭޝަނެއް ހިންގާފައެވެ. މި އޮޕަރޭޝަންތަކުގެ ތެރެއިން 23 މައްސަލައެއް މާލީ ކުށްތަކާއި ނުވަތަ "މަނީ ލޯންޑަރިންގ" މައްސަލަތަކުގެ ގޮތުގައި ފާހަގަކުރެވި، ހާއްސަ ތަހުގީގުތަކެއް ވަނީ ހިންގާފައެވެ. މިއީ މަސްތުވާތަކެތީގެ ކުށްތަކުގެ މާލީ މުއާމަލާތްތައް ހުއްޓުވުމަށް އެޅުނު މުހިންމު ފިޔަވަޅެކެވެ.
ގާނޫނު ތަންފީޒުކުރުމުގެ ދާއިރާ ކުރިއަށްވުރެ ވަރުގަދަކޮށް، މަސްތުވާތަކެތީގެ ވިޔަފާރިކުރާ މީހުންނަށް ދެން ސަލާމަތްނުވެވޭނެ ގޮތަށް ފިޔަވަޅުތައް ވަރުގަދަކުރެވެމުންދާ ކަމަށްވެސް މިނިސްޓަރު ވިދާޅުވިއެވެ. މިއީ ރާއްޖެއިން މަސްތުވާތަކެތި ނައްތާލުމަށް ކުރެވޭ މަސައްކަތުގައި އެޅުނު ތާރީހީ ގާނޫނީ ފިޔަވަޅެއްގެ ގޮތުގައި ސަރުކާރުން ސިފަކުރެއެވެ.
