ޖުޑިޝަރީ އިޞްލާޙް ކުރުމަށް ސަރުކާރުން ކުރަމުންދާ މަސައްކަތުގެ ތެރެއިން ސުޕްރީމް ކޯޓުގެ ފަނޑިޔާރުންގެ ބެންޗް މަދުކުރުމަށް ހުށަހެޅި ބިލް މަޖިލީހުން ބަލައިގަތުމާއެކު، ވިޕްލައިނާއި ޚިލާފުވި ކޮންގްރެސް (ޕީއެންސީ)ގެ މެންބަރުންނާއި މެދު ފިޔަވަޅު އަޅަން އެ ޕާޓީން ނިންމައިފިއެވެ.

ޕީއެންސީއަށް ނިސްބަތްވާ ހޮޅުދޫ ދާއިރާގެ މެންބަރު އަބްދުއްސައްތާރު މުޙައްމަދު ހުށަހެޅުއްވި އެ ބިލް ބަލައިގަތީ ޕީއެންސީއަށް ނިސްބަތްވާ 64 މެންބަރެއްގެ ވޯޓާއި އެކުގައެވެ. އެހެންނަމަވެސް ޕީއެންސީއަށް ނިސްބަތްވާ 10 މެންބަރަކު ވޯޓުގައި ބައިވެރިވެވަޑައެއް ނުގަންނަވައެވެ.

އެ ވޯޓުގެ ކުރިން ޕީއެންސީން އޮތީ އެ ބިލް ބަލައިގަތުމަށް ވޯޓު ދިނުމަށް އަންގައި ތްރީލައިން ވިޕެއް ނެރެފައެވެ. ނަމަވެސް ވޯޓު އޮތް ގަޑީގައި ޕީއެންސީއަށް ނިސްބަތްވާ ބައެއް މެންބަރުން ތަޅުމަށް ވަޑައިނުގަންނަކަން ފާހަގަ ކުރެވެއެވެ.

މިކަމާއި ގުޅިގެން ޕީޖީ ލީޑަރު އިބްރާހިމް ފަލާޙު ވަނީ ވިޕްލައިނާއި ޚިލާފުވި މެންބަރުންނާއިމެދު ގަވާއިދުގައިވާ ގޮތުގެ މަތިން ފިޔަވަޅު އަޅާނެ ކަމަށް އަންގަވާފައެވެ.

ވޯޓުގައި ބައިވެރިނުވި ޕީއެންސީގެ މެންބަރުންގެ ތެރޭގައި ހިމެނެނީ:

- ހިތަދޫ މެދު ދާއިރާގެ މެންބަރު އަޙްމަދު ރަޝީދު

- މައްޗަންގޮޅި އުތުރު ދާއިރާގެ މެންބަރު މުޙައްމަދު ރަޝީދު

- މިލަންދޫ ދާއިރާގެ މެންބަރު ޙަސަން މުފީދު ޢަބްދުލްޤާދިރު

- އިހަވަންދޫ ދާއިރާގެ މެންބަރު އަޙްމަދު ނަސީރު

- ގަމު ދާއިރާގެ މެންބަރު ޔޫސުފް ނަޝީދު

- ކެނދިކުޅުދޫ ދާއިރާގެ މެންބަރު މުޙައްމަދު ޢާޠިފް

- ކުޑަހުވަދޫ ދާއިރާގެ މެންބަރު ޙުސައިން ޙާމިދު

- ފުވައްމުލަކު ދެކުނު ދާއިރާގެ މެންބަރު އިބްރާހިމް ޙުސައިން

- ފަރެސްމާތޮޑާ ދާއިރާގެ މެންބަރު އަޝްރަފް ރަޝީދު

- ތިނަދޫ އުތުރު ދާއިރާގެ މެންބަރު ސަޢުދުﷲ ޙިލްމީ

މި ބިލް ބަލައިގަތުމާއެކު، އެ ބިލް ދިރާސާކުރުމަށް މަޖިލީހުގެ ޖުޑިޝަރީ ކޮމިޓީގެ ބައްދަލުވުމެއް މިއަދު ހަވީރު 4:00 ގައި ބޭއްވުމަށް ވަނީ އެޖެންޑާ ކޮށްފައެވެ.