ޔަމަނުގެ ހޫޘީ ޖަމާޢަތުން އެމެރިކާގެ އަސްކަރީ މަތިންދާބޯޓަކަށް މިސައިލް ޙަމަލާއެއް ފޮނުވާލައިފި ކަމަށް ޚަބަރުތައް ބުނެފިއެވެ. ނަމަވެސް މި މިސައިލް އެ ބޯޓާއި ހަމައަށް ނުދިޔަ ކަމަށް އެމެރިކާގެ ދެ އޮފިޝަލަކު ބުނެފައިވާ ކަމަށް ރޮއިޓަރސް އިން ވަނީ ހާމަކޮށްފައެވެ.

މި ޙަމަލާ ދީފައިވަނީ ރަތް ކަނޑުގައި ނުވަތަ ޔަމަނުގެ ސަރަޙައްދުގައިކަން އަދި ކަށަވަރުވެފައެއް ނުވެއެވެ. އެހެންނަމަވެސް މިއީ ހޫޘީންގެ ވައިގެ ޙަމަލާތައް އަމާޒުކުރުމުގެ ޤާބިލުކަން އިތުރުވެފައިވާ ކަމުގެ ހެއްކެއް ކަމަށް އެމެރިކާގެ އޮފިޝަލުން ވަނީ ފާހަގަކޮށްފައެވެ.

ހޫޘީންގެ ވެރިޔާ ޢަބްދުލް މަލިކް އަލް ހޫޘީ ވަނީ ފެބްރުއަރީ 13 ވަނަ ދުވަހު ދިން ޓީވީ ތަޤުރީރެއްގައި، އެމެރިކާ އާއި އިސްރާއީލުން ޣައްޒާއިން ފަލަސްޠީނުގެ ރައްޔިތުން ގަދަބާރުން ބޭލުމަށް މަސައްކަތްކުރާނަމަ، ރަތް ކަނޑުން ދަތުރުކުރާ އުޅަނދުތަކަށް މިސައިލާއި ޑްރޯން މެދުވެރިކޮށް ޙަމަލާދޭނެ ކަމަށް ބުނެފައެވެ.

ޣައްޒާގައި ހިނގަމުންދިޔަ ހަނގުރާމަ މެދުކަނޑާލާފައި ވަނީ ޙަމާސް އާއި އިސްރާއީލާއި ދެމެދު ޖަނަވަރީ 19 ވަނަ ދުވަހު ވެވުނު އެއްބަސްވުމަކާއި ގުޅިގެންނެވެ. ނަމަވެސް އިސްރާއީލުން ވަނީ މި އެއްބަސްވުމާިއ ތަކުރާރުކޮށް ޚިލާފުވެފައެވެ.