ދ. ކުޑަހުވަދޫގައި ޑޮލަރު އޭޓީއެމް އެއް ޤާއިމްކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

ކުޑަހުވަދޫގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުން ރައީސް ވަނީ ކުޑަހުވަދޫގެ ރައްޔިތުންގެ ކަންބޮޑުވުންތައް އަޑުއައްސަވައި، އެކަންކަން ހައްލުކޮށްދެއްވާނެކަމުގެ ޔަގީންކަން ދެއްވާފައެވެ. މީގެ ތެރޭގައި ބޯހިޔާވަހިކަމުގެ މައްސަލަ ހައްލުކުރުމާއި، ކުނި މެނޭޖުކުރުމުގެ ރަނގަޅު ނިޒާމެއް ޤާއިމްކުރުން ހިމެނޭ ކަމަށް ރައީސް ވިދާޅުވިއެވެ.

ރައީސް ވިދާޅުވީ އެމަނިކުފާނުގެ އަމާޒަކީ އޭޓީއެމްގެ ޚިދުމަތް ނުފެށި ހުރި ރަށްތަކުގައި އެ ޚިދުމަތް އަހަރެއްގެ ތެރޭގައި ދޭން ފެށުން ކަމަށެވެ. އެގޮތުން، ކުޑަހުވަދޫގައި ޑޮލަރު އޭޓީއެމްއެއް ޤާއިމްކޮށްދެއްވާނެކަމަށް ރައީސް ވަނީ ވިދާޅުވެފައެވެ.

ކުޑަހުވަދޫގައި ޑޮލަރު އޭޓީއެމްގެ ޚިދުމަތް ޤާއިމްކުރައްވާނެކަމަށް ރައީސް ވިދާޅުވެފައިވާއިރު، ބޭންކިން ނިޒާމުގެ ތެރެއިން ޑޮލަރު މާރުކުރުން ލާޒިމްކުރާ ޤާނޫނާއެކު ބޭރު ފައިސާގެ ދަތިކަމަށް ޙައްލު އަންނަން ފަށާފައިވާ ކަމަށާއި، ދައުލަތުގެ ރަސްމީ ރިޒާވަށް ބޮޑު ކުރިއެރުމެއް އައިސްފައިވާކަމަށް ސަރުކާރުން ވަނީ ބުނެފައެވެ.

ދ. އަތޮޅަށް ރައީސް ކުރައްވަމުން އަންނަ ދަތުރުފުޅުގެ ތެރޭގައި ބޭންކް އޮފް މޯލްޑިވްސް (ބީއެމްއެލް) އިން ވަނީ އެ ބޭންކުގެ ކުޑަހުވަދޫ ބްރާންޗުގެ އައު ޢިމާރާތުގެ ބިންގާ އަޅާފައެވެ. އަދި ބީއެމްއެލްގެ ސެލްފް ސަރވިސް އޭޓީއެމް އެއްވެސް މިއަދު ވަނީ ހުޅުވާފައެވެ.