ވެރިކަމާއި ހަވާލުވެވަޑައިގަތުމަށްފަހު ފުރަތަމަ އަހަރެއްހާ ދުވަހުގެ ތެރޭގައި ކުރެއްވި މަސައްކަތުން ރައްޔިތުންނަށް ވެވަޑައިގެންފައިވާ ވަޢުދުތައް ފުއްދޭނެގޮތަށް ކަންކަން މިއަދު ފަހިވެފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ ދ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅު ކުޑަހުވަދޫއަށް ވަޑައިގެން އެ ރަށު ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވާހަކަފުޅުދައްކަވަމުންނެވެ.

ރައީސް ވިދާޅުވީ އެމަނިކުފާނު ވެރިކަމާއި ހަވާލުވެވަޑައިގެންނެވިއިރު ޤައުމުގެ ޙާލަތު އޮތްގޮތާއި މިއަދު ޤައުމުގެ ޙާލަތު އޮތް ގޮތް ތަފާތު ކަމަށެވެ. ޚާއްސަގޮތެއްގައި އިޤްތިޞާދީ ޙާލަތުވެސް މިއަދާއި އޭރާއި ތަފާތުކަން ރައީސް ފާހަގަކުރެއްވިއެވެ.

"ވެރިކަމާއި ހަވާލުވެވަޑައިގަތުމަށްފަހު ފުރަތަމަ ތަންފީޒުކުރަން ޖެހުނީ އޭގެކުރިން އޮތް އެމްޑީޕީގެ ސަރުކާރުން އެކުލަވާލާފައިވާ ބަޖެޓެއް. އެ ބަޖެޓު އޮތީ އަޅުގަނޑު ރައްޔިތުންނަށް ވެފައިވާ ވަޢުދުތައް ފުއްދޭނެ ގޮތަކަށް ނޫން." ރައީސް ވިދާޅުވިއެވެ.

ރައީސް އިތުރަށް ވިދާޅުވީ ރާއްޖޭގެ އިޤްތިޞާދު އޮތްގޮތުން ފުރަތަމަ ޖެހިވަޑައިގަތީ ބޭރާއި އެތެރޭގެ ދަރަނިތައް ދެއްކުމާއި އިޤްތިޞާދު ހަރުދަނާކުރެއްވުމަށް މަސައްކަތްތަކެއް ކުރެއްވުމަށް ކަމަށެވެ. އަދި އެ މަސައްކަތްތަކުގެ ނަތީޖާ މިހާރު ފެންނަމުންދާކަންވެސް ރައީސް ފާހަގަކުރެއްވިއެވެ.

ރައީސް އިތުރަށް ވިދާޅުވީ ރައްޔިތުންނަށް ވެފައިވާ ވަޢުދުތައް ފުއްދެވުމަށް ޢަމަލީގޮތުން މަސައްކަތްކުރައްވާ މަންޒަރު މިއަހަރު ފެނިގެންދާނެ ކަމަށެވެ. އަދި އެކަންކަން ފަހިކުރެއްވުމަށް ރައްޔިތުން ދެއްވަމުން ގެންދަވާ އެއްބާރުލެއްވުމަށް ރައީސް ވަނީ ޝުކުރު އަދާކުރައްވާފައެވެ.

ރައީސްގެ މި ވާހަކަފުޅުތަކާއެކު، އެމަނިކުފާނުގެ ސަރުކާރުން ކުރިއަށް ގެންދަވާ ތަރައްޤީގެ މަޝްރޫޢުތަކުގެ ތަފްސީލުތަކެއްވެސް ހިއްސާކުރެއްވިއެވެ. އޭގެ ތެރޭގައި ދ. އަތޮޅުގެ ރަށްތަކުގައި ހިންގަމުންދާ ބަނދަރު ހެދުމާއި، ބޯހިޔާވަހިކަމުގެ މަޝްރޫޢުތަކާއި، ޞިއްޙީ ދާއިރާ ހަރުދަނާކުރުމުގެ މަސައްކަތްތައް ހިމެނެއެވެ.

ކުޑަހުވަދޫގެ ނަރުދަމާ ނިޒާމު އަދި ކަރަންޓުގެ ޚިދުމަތް ރަނގަޅުކުރުމާ ގުޅޭ ގޮތުން ރައީސް ވިދާޅުވީ ކަމާބެހޭ ވުޒާރާތަކާ މަޝްވަރާކުރައްވައި، އަވަސް މުއްދަތެއްގެ ތެރޭގައި ޙައްލު ހޯއްދަވައިދެއްވާނެ ކަމަށެވެ.

"އަޅުގަނޑުމެންގެ އަމާޒަކީ ރާއްޖޭގެ ހުރިހާ ރަށެއްގައިވެސް އެއް ފެންވަރެއްގެ ޚިދުމަތްތަކެއް ފޯރުކޮށްދިނުން. މިކަމަށްޓަކައި ސަރުކާރުގެ ހުރިހާ މުއައްސަސާތަކެއް މިވަގުތު މަސައްކަތް ކުރަމުން މިދަނީ." ރައީސް ވިދާޅުވިއެވެ.

ރައީސްގެ މި ދަތުރުފުޅަކީ ރައްޔިތުންގެ ކަންބޮޑުވުންތައް އަޑުއައްސަވައި، ސަރުކާރުގެ ތަރައްޤީގެ މަޝްރޫޢުތަކުގެ ކުރިއެރުން ބައްލަވާލެއްވުމަށް ކުރައްވާ ދަތުރުފުޅެކެވެ.