ހުޅުމާލޭގައި ހުންނަ އިމިގްރޭޝަން ޑިޓެންޝަން ސެންޓަރުގައި ތިބި ބައެއް ބިދޭސީން ކާނާ ވިހަވެ، ހުޅުމާލެ ހޮސްޕިޓަލުގައި ފަރުވާ ދެމުންދާ ކަމަށް އިމިގްރޭޝަނުން މަޢުލޫމާތު ދީފިއެވެ.

އިމިގްރޭޝަނުން ބުނީ މި ވަގުތު 17 މީހަކަށް ހުޅުމާލެ ހޮސްޕިޓަލުގައި ފަރުވާ ދެމުން އަންނަ ކަމަށެވެ. އަދި މި ކަމުގައި އަސަރުކޮށްފައިވާ ބިދޭސީންނަށް ވީ އެންމެ އަވަސް ފަރުވާއެއް ފޯރުކޮށްދިނުމަކީ މި ވަގުތު އެންމެ އިސްކަމެއް ދީގެން ކުރެވެމުންދާ ކަމެއް ކަމަށް އިމިގްރޭޝަނުން ވަނީ ބުނެފައެވެ.

އިމިގްރޭޝަނުން މި މައްސަލަ ބަލަމުންދާއިރު، ފުލުހުންގެ ސަމާލުކަމަށް ވެސް މި މައްސަލަ އައިސްފައިވާ ކަމަށް މަޢުލޫމާތު ލިބެއެވެ. ނަމަވެސް މި ހާދިސާ ހިނގި ގޮތުގެ ތަފްޞީލު އަދި ސާފުވެފައެއް ނުވެއެވެ.

އިމިގްރޭޝަން ޑިޓެންޝަން ސެންޓަރުގައި މިހާރު ބައިތިއްބަނީ ގަވާއިދާ ޚިލާފަށް އުޅެމުންދާ ބިދޭސީންގެ ތެރެއިން ރާއްޖެއިން ފޮނުވާލާ މީހުންނެވެ.