ސްރީލަންކާގެ ރައްޔިތަކު، އެކްސް މެދުވެރިކޮށް ރާއްޖޭގެ ފޮރިން މިނިސްޓަރު ޑރ. އަބްދުﷲ ޚަލީލަށް އިންޒާރުދެމުންދާ ކަމަށް ތުހުމަތު ކުރެވޭ މައްސަލައެއް ފުލުހުން ބަލަން ފަށައިފިއެވެ.

މި މައްސަލަ ފެންމަތިވެފައިވަނީ މިނިސްޓަރު ޚަލީލް ސްރީލަންކާއަށް ކުރައްވާ ރަސްމީ ދަތުރުފުޅެއްގައި އެ ގައުމުގެ ވެރިރަށް ކޮލޮމްބޯގައި ހުންނަވަނިކޮށް، ނަދީޝް ޕެރެރާ ނަމަކަށް ކިޔާ ލަންކާގެ ރައްޔިތަކު ކަމަށް ބެލެވޭ މީހަކު އެކްސްގައި މިނިސްޓަރުގެ ފޮޓޯ ހިއްސާކުރައްވައި އެކި ކަހަލަ އިންޒާރު ދިނުމާއި ގުޅިގެންނެވެ.

މިނިސްޓަރު ހަލީލްއަށް ދިން ނުސީދާ އިންޒާރުތަކުގެ ތެރޭގައި، ހަލީލްގެ ކާރު ސްރީލަންކާގައި އެކްސިޑެންޓުވެ، ކާރުގައި ރޯވެދާނެ ކަމަށް ބުނެފައި ވެއެވެ.

އިތުރު ޕޯސްޓެއްގައި ވާގޮތުން، ކޮލަމްބޯގައި ޚަލީލަށް ރައްކާތެރިކަން އެބައޮތްތޯ ސުވާލު އުފައްދާފައި ވެއެވެ. އަދި ނިދާފައި ހޭލާއިރު ހަށިގަނޑުގެ ބައެއް ގުނަވަންތައް ވެސް މަދުވެދާނެ ކަމަށް ބުނެ އިންޒާރު ދީފައި ވެއެވެ.

އިތުރު ޕޯސްޓެއްގައި ރޯމް ބޯއިއެއް ނުވަތަ ވެއިޓަރެއްގެ ގޮތުގައި ވެސް މީހަކު އައިސް ޚަލީލް މަރާލާނެ ކަމަށް ދޭހަވާ ގޮތަށް އިންޒާރު ދީފައިވެ އެވެ.

މި މައްސަލައާއި ގުޅޭގޮތުން މީޑިއާތަކާ ހިއްސާކުރި މެސެޖެއްގައި ފުލުހުން ބުނެފައިވަނީ މި މައްސަލަ ފުލުހުންގެ ސަމާލުކަމަށް އައިސްފައިވާ ކަމަށާއި، އެކަމާއި ގުޅުންހުރި އިދާރާތަކާއެކު ބަލަންޖެހޭ ކަންކަން ބަލަމުންދާ ކަމަށެވެ.

އެނގިފައިވާ ގޮތުގައި މި އިންޒާރުދޭ ކަމަށް ބެލެވޭ ފަރާތުގެ ފޮޓޯ ޖަހާފައިވާ އެކްސް އެކައުންޓުގައިވާ މީހާ އަކީ ރާއްޖެ ނާދެވޭ ގޮތަށް ޑީޕޯޓް ކޮށްފައިވާ ލަންކާ މީހެކެވެ. އޭނާ ކުރިން ދިރިއުޅުނީ ދިވެއްސަކާއި ކައިވެނިކޮށްގެން ރާއްޖޭގައެވެ. އޭނާގެ އެކްސް އެކައުންޓްގައި ގިނަ އަދަދަކަށް އިމިގްރޭޝަން ކޮންޓްރޯލާ ޖެނެރަލް ޝައްމާން ވަހީދާއި މިނިސްޓަރު ޚަލީލް ޓެގުކޮށް ޕޯސްޓުކޮށްފައިވާކަން ވަނީ ފާހަގަކުރެވިފައެވެ.

ނަމަވެސް މި އެކައުންޓް ހިންގަނީ އޭނާ ކަމެއް ނުވަތަ މިއީ ދިވެއްކު ހިންގާ ފޭކު އެކައުންޓެއް ކަމެއް ޔަޤީނެއް ނުވެއެވެ.

އޭނާގެ ޕޯސްޓުތަކުގައި އޭނާގެ ދަރިފުޅާ ދުރުވާން ޖެހުމުން ދެރަވާކަމަށާއި، އޭނާގެ ދެ އަހަރުގެ ދަރިފުޅު ހުރީ ރާއްޖޭގައި ކަމުން ނުވަ މަސްވަންދެން ދަރިފުޅު ނުފެންނަ ކަމަށް ބުނެފައިވެއެވެ. އަދި ރާއްޖެއަށް ދިޔުމަށް އެކްސެސް ދިނުމަށް ވެސް ގޮވާލާފައިވެއެވެ.

ފާހަގަކޮށްލެވޭ ގޮތުގައި ލަންކާ އަކީ މިހާރަކަށް އައިސް ގޭންގު ކުށްތަކުގައި ފާހަގަކޮށްލެވޭ ޤައުމެކެވެ. މިފަހުން ވެސް ލޯޔަރަކަށް ވެގެން މީހަކު ކޯޓަށް ވަދެ އަންޑަވޯލްޑް ގޭންގުސްޓާރެއްގެ ގަޔަށް ބަޑި ޖަހައި މަރާލާފައި ވެއެވެ.