ސްރީލަންކާގައި ފާއިތުވި ދިހަ އަހަރު ތެރޭގައި ވެސް ކުރިމަތިނުވާ ވަރަށް ޑެންގޫ ބަލިމަޑުކަން ފެތުރި، ބަލިޖެހުނު މީހުންގެ ޖުމްލަ އަދަދު 80،000 އަށް އަރައިފިއެވެ.

ލަންކާގެ ނޭޝަނަލް ޑެންގޫ ކޮންޓްރޯލް ޔުނިޓާއކ ސިއްހީ އިދާރާތަކުން ހާމަކޮށްފައިވާ ގޮތުގައި، ބަލި ފެތުރޭ މިންވަރު މިހާރު ހުރީ 1 ލައްކައަށްވުރެ ގިނަ މީހުންނަށް ބަލިޖެހުނު 2017 ވަނަ އަހަރުގެ “ޑެންގޫ ކާރިސާ” އާއި ދާދި އެއްވަރެއްގައެވެ. އެ އަހަރު ޑެންގޫ ހުން ޖެހިގެން 300 މީހުން ލަންކާ އިން މަރުވިއެވެ.

އިއްޔެ ނެރުނު އެންމެ ފަހުގެ ރިޕޯޓުތައް ބުނާގޮތުން، ލަންކާއިން 79،000 އަށްވުރެ ގިނަ ޑެންގޫ ކޭސް ވަނީ ރިޕޯޓުކޮށްފައެވެ. އަދި މި ބަލީގައި މިހާތަނަށް 59 މީހަކު ވަނީ މަރުވެފައެވެ. ސިއްހީ މާހިރުން ވިދާޅުވާ ގޮތުގައި ބަލި މިހާ ބާރަށް ފެތުރެން ދިމާވީ މޫސުމީ ވިއްސާރައަށްފަހު ގައުމުގެ އެކި ހިސާބުތަކުގައި ފެންބޮޑުވުމުގެ ސަބަބުންނާއި، ޑެންގޫގެ ނުރައްކާތެރި ވޭރިއަންޓެއް ކަމަށްވާ "ޑީއީއެންވީ-2” ފެތުރެމުންދާތީއެވެ.

މި ބަލިމަޑުކަމުގެ އެންމެ ފަހުގެ ތަފްސީލުތައް:

1. ޖުލައި މަހުގެ ސާޖް: ހަމައެކަނި މި ހިނގާ ޖުލައި މަހުގެ މިހާތަނަށް ވެސް 23،000 އަށްވުރެ ގިނަ ކޭސް ވަނީ ފެނިފައެވެ.
2. އެންމެ ނުރައްކާ ބޮޑު ސަރަހައްދު: ބަލިޖެހުނު މީހުންގެ %53 އަކީ ކޮލަމްބޯ އާއި ގަމްޕަހާ ހިމެނޭ ވެސްޓަން ޕްރޮވިންސް ގެ މީހުންނެވެ.
3. ހޮސްޕިޓަލްތަކަށް ބާރުބޮޑުވުން: ބައެއް ހޮސްޕިޓަލްތަކުގެ ބެޑް ކެޕޭސިޓީ ފުރިގެން، އެހެން ވޯޑުތަކަށް ބަލިމީހުން ބަދަލުކުރަން ޖެހިފައިވެއެވެ. ޔުނިވަރސިޓީ އޮފް ކޮލަމްބޯގެ ބައެއް ކްލާސްތައް ވެސް ވަނީ އޮންލައިންކޮށްފައެވެ.
4. ސިފައިންނާއި ޑްރޯންގެ އެހީތެރިކަން: މަދިރި އާލާވާ ތަންތަން ހޯދުމަށް ލަންކާގެ އެއަރފޯސް އިން ދަނީ ޑްރޯން ބޭނުންކޮށްގެން ފުރާޅުތަކާއި ފެންހަރުލާ ސަރަހައްދުތައް ބަލަމުންނެވެ.

ލަންކާ ސަރުކާރުން މިހާރު ދަނީ މަދިރި ނައްތާލުމުގެ ބޮޑު ގައުމީ ކެމްޕޭނެއް ހިންގަމުންނެވެ. އަދި ބަލީގެ އަލާމާތެއް ފެނިއްޖެނަމަ ލަސްނުކޮށް ޑޮކްޓަރަށް ދެއްކުމަށް އިލްތިމާސްކުރެއެވެ.