ރާއްޖެ އިން ފުރައިގެން ސްރީލަންކާގެ ބަންޑާރަނައިކަ އިންޓަނޭޝަނަލް އެއާޕޯޓު (ކަޓުނަޔަކަ އެއާޕޯޓު) މެދުވެރިކޮށް އެ ގައުމަށް ގިނަ އަދަދެއްގެ މަސްތުވާތަކެތި އެތެރެކުރި ދެ ދިވެހިން ސްރީލަންކާގެ ޕޮލިސް ނާކޮޓިކް ބިއުރޯ (ޕީއެންބީ) އިން ހިންގި ޚާއްސަ އޮޕަރޭޝަނެއްގައި ހައްޔަރުކޮށްފިއެވެ. މިދިޔަ ބުދަ ދުވަހުގެ މެންދުރުފަހު ހިންގި މި އޮޕަރޭޝަނުގައި ފުރަތަމަ ހައްޔަރުކޮށްފައި ވަނީ އުމުރުން 40 އަހަރުގެ ދިވެހި ފިރިހެނެކެވެ. ލަންކާގެ ނޫސްތަކުން ރިޕޯޓުކޮށްފައިވާ ގޮތުގައި އޭނާގެ އަތުން ގާތްގަނޑަކަށް 10 މިލިއަން ސްރީލަންކާ ރުޕީސްގެ 'އައިސް' (މެތަމްފެޓަމިން) ވަނީ އަތުލައިގަނެފައެވެ.

މި އޮޕަރޭޝަން ކުރިއަށް ގެންގޮސްފައިވަނީ ޖުލައި 22 ވަނަ ދުވަހު ފިޓްސްއެއާގެ ފްލައިޓަކުން މާލެ އިން ލަންކާ އަށް ދިވެއްސަކު މަސްތުވާތަކެތި ހިފައިގެން އަންނަ ކަމަށް ޕީއެންބީގެ ޑެޕިއުޓީ ޑިރެކްޓަރަށް ލިބުނު އިންޓެލިޖެންސް މައުލޫމާތަކާއި ގުޅިގެންނެވެ. މި މައުލޫމާތު ލިބުމާއި އެކު، ކޮލޮމްބޯގެ ޕީއެންބީ ހެޑްކުއާޓާާރްސްގެ އޮފިސަރުންނާއި އެއާޕޯޓުގެ ސަލާމަތީ ބާރުތައް ގުޅިގެން އެއާޕޯޓުގެ އެރައިވަލް ޓާމިނަލްގެ ބެގޭޖް ކްލެއިމް ސަރަހައްދުން ވަނީ އޭނާ އަތުލާފައެވެ.

ލަންކާ އަށް އެދުވަހުގެ މެންދުރު 12:15 އެހާކަންހާއިރު ފްލައިޓުން ފޭބި 40 އަހަރުގެ ދިވެހި މީހާ ހުއްޓުވައި ބަލައި ފާސްކުރިއިރު، އޭނާގެ ޖިންސީ ގުނަވަނާއި ދިމާލުގައި ސެލޯޓޭޕް އަޅައި ފޮރުވާފައި ހުރި 602 ގްރާމްގެ 'އައިސް' ފެނިފައިވެއެވެ.

ފުލުހުން އެ މީހާ ހައްޔަރުކޮށް ސުވާލު ކުރުމުން، އޭނާ އެތަކެތި ގެނައީ ސްރީލަންކާގައި ފުޅާ ދާއިރާއެއްގައި 'އައިސް' ވިއްކުމުގެ ވިޔަފާރި ހިންގާ މައި ސަޕްލަޔަރަކާއި ހަވާލު ކުރަން ކަމަށް އިއުތިރާފު ވެފައި ވެއެވެ. އޭނާ ދިން މައުލޫމާތުގެ މައްޗަށް ބިނާކޮށް، ޕީއެންބީގެ އޮފިސަރުން ވަނީ އެރޭގެ ވަގުތެއްގައި ކޮލޮމްބޯގެ ހޮޓަލެއްގައި ހުރި އުމުރުން 28 އަހަރުގެ ދެވަނަ ދިވެހި ފިރިހެން މީހާ ވަނީ ހައްޔަރުކޮށްފައެވެ. އޭނާ ހައްޔަރުކުރި ވަގުތު އޭނާގެ އަތުން އިތުރު 10 ގްރާމާއި 670 މިލިގްރާމްގެ 'އައިސް' ފުލުހުންގެ ބެލުމުގެ ދަށަށް ގެންގޮސްފައިވެއެވެ.

މި މައްސަލާގައި ހައްޔަރުކޮށްފައިވަނީ ފ. ނިލަންދޫ، ނިރު، ޙަސަން ޢަބްދުالله (40އ) އާއި، ހ. ޕާމޭރިއާ، މުޙައްމަދު ޝާފީ ބިން އަޙްމަދު (28އ) އެވެ. ހައްޔަރުކުރެވުނު ދެ ދިވެހިން ބުރާސްފަތި ދުވަހު ނެގޮމްބޯ މެޖިސްޓްރޭޓް ކޯޓަށް ހާޒިރު ކުރުމުން، މައްސަލައިގެ އިތުރު ތަހުގީގަށް އެ ދެ މީހުން 14 ދުވަހުގެ މުއްދަތަކަށް ވަނީ ލަންކާ ފުލުހުންގެ ބެލުމުގެ ދަށުގައި ހައްޔަރު ކޮށްފައެވެ.