ނެޝަނަލް ޑްރަގް އެޖެންސީ (އެންޑީއޭ)ގެ ފަރުވާގެ ނިޒާމަށް ކްލައިންޓުން ވެއްދުމުގެ މަރުޙަލާ އަވަސްކުރުމަށްޓަކައި، ކަމާގުޅޭ އިޖުރާއަތުތައް ހަލުވިކުރުމަށް ކުރެވިދާނެ މަސައްކަތައްކަތްތަކާއި ގުޅޭގޮތުން މިއަދު ބޭއްވުނު އެންޑީއޭގެ ބޯޑުގެ 28ވަނަ ބައްދަލުވުމުގައި މަޝްވަރާކޮށްފިއެވެ.
އެންޑީއޭއިން ދެއްވި މަޢުލޫމާތުގައިވާ ގޮތުން، މި ބައްދަލުވުމުގައި ދިވެހިރާއްޖޭގެ އަމިއްލަ ޖަމްޢިއްޔާތަކުގެ ތެރެއިން މަސްތުވާތަކެތީގެ ދާއިރާގައި މަސައްކަތްކުރަމުންދާ ޖަމްޢިއްޔާތައް ބާރުވެރިކުރުވުމާއި، އެފަރާތްތަކަށް ދޭންޖެހޭ އެހީތެރިކަމާއި އެއްބާރުލުން އިތުރުކުރުމަށްޓަކައި އެޅިދާނެ ފިޔަވަޅުތަކާއި ގުޅޭގޮތުންވެސް މަޝްވަރާކުރެވުނެވެ.
މީގެއިތުރުން، މުރާޖަޢާ ކޮމިޓީން މައްސަލަތައް ނިންމުމުގެ މަރުޙަލާ އަވަސްކުރުމަށްވެސް މި ބައްދަލުވުމުގައި ނިންމާފައިވެއެވެ. އަދި ފަރުވާ ފުރިހަމަނުކުރާ ފަރާތްތަކަށް ފިޔަވަޅުއެޅުމާއި އެކަން ތަންފީޒުކުރުމަށް މުރާޖަޢާ ކޮމިޓީއަށް އަންގާފައިވާކަމަށް އެންޑީއޭއިން ހާމަކުރިއެވެ.
އެންޑީއޭއިން ވިދާޅުވިގޮތުގައި މި ބައްދަލުވުމުގައި ނިންމުނު ކަންތައްތަކުގެ ސަބަބުން، މަސްތުވާތަކެއްޗާ ދެކޮޅަށް ކުރެވޭ މަސައްކަތްތައް އިތުރަށް ހަރުދަނާވެ، ފަރުވާގެ ޚިދުމަތްތައް އިތުރަށް ފުޅާވެގެންދާނެ ކަމަށް އުންމީދުކުރެވެއެވެ.
މިހާރު ހިނގަމުންދާ ޚާއްސަ އޮޕަރޭޝަންގެ ދަށުން، އެންޑީއޭ އާއި ފުލުހުން ގުޅިގެން މަސްތުވާތަކެތި ބޭނުންކުރާ 100 އަށްވުރެ ގިނަ މީހުން މިހާތަނަށް ފަރުވާގެ ނިޒާމުގެ ތެރެއަށް ވައްދާފައިވާކަން ފާހަގަކޮށްލެވެއެވެ. މި ޕްރޮގްރާމްގެ ދަށުން ރިހެބިލިޓޭޝަން ފަރުވާ އަމާޒުކުރަނީ މަގުމަތީގައި ސަލާންޖަހަން އުޅޭ މީހުންނާއި، ވައްކަމާއި ފޭރުމުގައި ހަރަކާތްތެރިވާ މީހުންނާއި، މަގުމަތީގައި މަސްތުގެ ހާލަތުގައި އުޅޭ މީހުންނާއި، މިސްކިތްތަކުގައި ނިދާ މަގުމަތިވެފައިވާ މީހުންނަށެވެ.
