ސަރުކާރުގެ ތިން ވުޒާރާއެއްގެ މަސައްކަތު ދާއިރާއަށް ބަދަލުތަކެއް ގެނައުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި މައްސަލަ ރައްޔިތުންގެ މަޖިލީހުން މިއަދު ފާސްކޮށްފިއެވެ.
ރައީސުލްޖުމްހޫރިއްޔާ މި މަހުގެ 10 ވަނަ ދުވަހު މަޖިލީހަށް ފޮނުއްވި ސިޓީފުޅުގައި ވިދާޅުވެފައިވަނީ، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 116 ވަނަ މާއްދާގެ (ހ) އިން ރައީސުލްޖުމްހޫރިއްޔާއަށް ލިބިދޭ އިޚްތިޔާރުގެ ދަށުން، 17 ނޮވެންބަރު 2023 ގައި އުފައްދަވާފައިވާ ވުޒާރާތަކުގެ ތެރެއިން ތިން ވުޒާރާއެއްގެ މަސައްކަތުގެ ދާއިރާއަށް ބަދަލު ގެނެސްފައިވާ ކަމަށެވެ. މި ތިން ވުޒާރާއަކީ:
- މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާ
- ދާޚިލީ ސަލާމަތާއި ފަންނިއްޔާތާ ބެހޭ ވުޒާރާ
- ސިއްޙީ ވުޒާރާ
މި މައްސަލަ މަޖިލީހުގެ ތަޅުމުން ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ފޮނުވުމަށްފަހު، ކޮމިޓީން ވަނީ ބަދަލުތައް ގެނައުމަށް ނިންމި ނިންމުން ފާސްކޮށް މަޖިލީހުގެ ތަޅުމަށް މިއަދު ރިޕޯޓް ހުށަހަޅާފައެވެ.
Advertisement
މަޖިލީހުގެ ރިޔާސަތުން މި މައްސަލައަށް ވޯޓަށް އެހުމުން، އެ ތިން ވުޒާރާގެ މަސައްކަތްތަކަށް ގެނައި ބަދަލުތައް ފާސްކުރުމަށް ފެންނަ ކަމަށް 65 މެންބަރުން ވޯޓުދެއްވިއެވެ. ނުފެންނަ ކަމަށް އެއްވެސް މެންބަރަކު ވޯޓު ދެއްވާފައެއް ނުވެއެވެ.
މި ބަދަލުތަކާ ގުޅިގެން ކަމާބެހޭ ވުޒާރާތަކުގެ ވަޒީރުންނާއި އިސް އޮފިޝަލުން ވަނީ މަޝްވަރާތައް ފަށާފައެވެ. އަދި އާ އޮނިގަނޑުގެ ދަށުން މަސައްކަތްތައް ރޭވުމަށް ދަނީ ތައްޔާރުވަމުންނެވެ.
