ރައްޔިތުންނާ ގުޅޭ ކަންކަން ނިންމޭނީ ފަނޑިޔާރުންނަށް ކަމާމެދު ކުރީގެ ބަންޑާރަ ނައިބު ފާތިމަތު ދިޔާނާ ސައީދު ސުވާލު އުފައްދަވައިފިއެވެ.

ދިޔާނާ މިފަދައިން ސުވާލު އުފެއްދެވީ "ފަނޑިޔާރުގެ ސުވާލު: ރާއްޖޭގެ ދީނަކީ އިސްލާމްދީން ނޫން ކަމަށް މަޖިލީހުން ނިންމައިފިނަމަ އެމައްސަލަ ސުޕްރީމް ކޯޓަށް ބެލޭނެތޯ؟" ކަމަށް ލިޔެ އޮންލައިން ނޫހަކުން ކޮށްފައިވާ ވީޑިއޯއަކަށް ރައްދު ދެއްވަމުންނެވެ.

އެކަމަށް ރައްދު ދެއްވާ ދިޔާނާ ވިދާޅުވީ ސުވާލުގެ ޖަވާބުގައިވެސް އޮތީ ސުވާލެއް ކަމަށެވެ.

"ތިޔަފަދަ ކަމެއް ނިންމަން އެންމެ ލާއިގު ބަޔަކީ ކޮބާތޯ؛ ޔައުނީ ފަނޑިޔާރުންތޯ ނުވަތަ ރައްޔިތުންގެ ވޯޓުން ހޮވާފައިތިބި ރައްޔިތުންގެ މަންދޫބުންތޯ؟" ދިޔާނާގެ ޕޯސްޓުގައި ލިޔުއްވާފައިވެއެވެ.

ރާއްޖޭގެ ދީނަކީ އިސްލާމް ދީން ކަމަށް ޤާނޫނު އަސާސީގައި މިހާރު އޮތް އޮތުން ލިޔުނީ ފަނޑިޔާރުން ކަމާމެދުވެސް ދިޔާނާ ވަނީ ސުވާލު އުދައްދަވާފައެވެ.

ރައްޔިތުންގެ މަޖިލީހުގެ މެންބަރުން ޕާޓީ ބަދަލުކޮށްފިނަމަ ނުވަތަ ޕާޓީން ވަކިކޮށްފިނަމަ ގޮނޑި ގެއްލޭ ގޮތަށް ގެނައި އިސްލާހު ބާތިލް ކުރަން ސުޕްރީމް ކޯޓަށް ހުށަހެޅި މައްސަލައިގެ އަޑު އެހުންތައް ފަށާފައިވަނީ އިއްޔެއެވެ.

ބަންޑާރަ ނައިބުގެ އޮފީހުގެ ވަކީލު ފާތިމަތު ހަލީމް ވިދާޅުވެފައިވަނީ އެއީ ސުޕްރީމް ކޯޓަށް ބެލުމުގެ އިޚްތިޞާޞް އޮތް މައްސަލައެއް ނޫން ކަމަށެވެ.

ފާތިމަތު ހަލީމް ވިދާޅުވީ ޤާނޫނު އަސާސީއަށް ގެންނަ އިސްލާހުތަކަކީ ޤާނޫނު އަސާސީގެ ބައެއް ކަމަށާއި، ޤާނޫނު އަސާސީއަށް އިޖުރާއަތުގެ ތެރެއިން އުސޫލާއި އެއްގޮތަށް ގެންނަ އިސްލާހުތައް އެއްވެސް ކޯޓަކަށް ނުބެލޭނެ ކަމަށެވެ. އޭނާ ވިދާޅުވީ ސުޕްރީމް ކޯޓަށް ބެލޭނީ ޤާނޫނުއަސާސީ މާނަ ކުރުމާއި ގުޅޭ ގޮތުން ހުށަހަޅާ ދުސްތޫރީ މައްސަލަތައް އެކަނި ކަމަށެވެ.

ސުޕްރީމް ކޯޓުގައި ދައުލަތުން ދެއްކި އެ ވާހަކަތަކަށް ތާއީދު ކުރައްވާ މޭރުމަކުން ޑިމޮކްރެޓްސްގެ ރައީސް އިމްތިޔާޒް ފަހުމީ ވެސް ވަނީ އެކްސްގައި ޕޯސްޓެއް ކުރައްވާފައެވެ. އޭނާ ކުރެއްވި ޕޯސްޓުގައި ވެސް ވިދާޅުވީ ޤާނޫނު އަސާސީ ހަދައި، އެ އިސްލާހު ކުރުމުގެ ބާރު އޮތީ ހަމައެކަނި ރައްޔިތުންގެ މަޖިލީހަށް ކަމަށެވެ.