ފަނޑިޔާރުންގެ އެންމެ ބޮޑު އެއް ޒިންމާއަކީ ދިވެހި ދައުލަތުގެ މަޞްލަޙަތު ހިމާޔަތްކުރުން ކަމަށް އުއްތަމަފަނޑިޔާރު ޑރ. މުއުތަސިމް އަދުނާނު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ރާއްޖޭގެ ކޯޓުތަކަށް އަލަށް މެޖިސްޓްރޭޓުން އައްޔަނުކުރުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ.

އުއްތަމަފަނޑިޔާރު ވިދާޅުވީ، އިޚްލާޞްތެރިވުމަކީ ފަނޑިޔާރުންނަށް ވެސް ވަރަށް މުހިންމު ސިފައެއް ކަމަށެވެ. އެގޮތުން އަމިއްލަ ނަފްސަށާއި، ދީނަށާއި، ޤައުމަށްވެސް އިޚްލާޞްތެރިކަން އިސްކުރައްވަންޖެހޭނެ ކަމަށް އެމަނިކުފާނު ވިދާޅުވިއެވެ. އަދި ދައުލަތުގެ މަޞްލަޙަތު ހިމާޔަތްކުރެވޭނީ ޤާނޫނުގެ ވެރިކަން ދަމަހައްޓައިގެން ކަމަށް ވެސް އުއްތަމަފަނޑިޔާރު ފާހަގަކުރެއްވިއެވެ.

"ދިވެހި ދައުލަތުގެ މަޞްލަޙަތަކީ ދިވެހި ރައްޔިތުންގެ މަޞްލަޙަތު. ޤާނޫނުއަސާސީ އެބަ ބުނޭ ބާރުތައް ފެށެނީ އަދި ދެމި އޮންނަނީ ރައްޔިތުންގެ ކިބައިގައޭ. ދިވެހި ދައުލަތުގެ މަޞްލަޙަތަކީ ވަކި މީހެއްގެ މަޞްލަޙަތެއް ނޫން،" އުއްތަމަފަނޑިޔާރު ވިދާޅުވިއެވެ.

އުއްތަމަފަނޑިޔާރު ވަނީ ކޯޓުގެ ތެރޭގައި އަދި ކޯޓުން ބޭރުގައި ވެސް ފަނޑިޔާރުންގެ އަޚްލާޤު އިސްކުރެއްވުމަށް އެދިވަޑައިގެންފައެވެ. "ފަނޑިޔާރުކަން ކުރުމަކީ ބުރަ ކަމެއް. އެކަން އަޅުގަނޑުމެން ޤަބޫލުކުރަން ޖެހޭނެ، ވިސްނަން ޖެހޭނެ. އަޅުގަނޑުމެން މި މަސައްކަތް ކުރުމުގައި ކޯޓު ތެރޭގައި އަދި ކޯޓުން ބޭރުގައި އަޅުގަނޑުމެންގެ އުޅުމާއި ގުޅުން ބަހައްޓަން ޖެހޭ ގޮތް ވަރަށް މުހިންމު،" އެމަނިކުފާނު ވިދާޅުވިއެވެ.

އުއްތަމަފަނޑިޔާރު އިތުރަށް ވިދާޅުވީ، ކޯޓަށް ހުށަހެޅޭ މައްސަލަތައް އަބަދު ވެސް ބިނާވަނީ ކޮންމެވެސް ޚުޞޫމާތެއްގެ މައްޗަށް ކަމަށާއި، އެންމެންގެ ހިތްހަމަޖެހޭ ގޮތަށް މައްސަލަ ނިންމޭނީ މަދު ފަހަރެއްގައި ކަމަށެވެ. ނަމަވެސް، ކޮންމެ ޙާލަތެއްގައި ވެސް ފަނޑިޔާރުން މަސައްކަތް ކުރަން ޖެހޭނީ ޤާނޫނާ އެއްގޮތަށް އަދުލުވެރިކަމާއެކު ކަމަށް އެމަނިކުފާނު ވިދާޅުވިއެވެ.