ހައިކޯޓުގެ ފަނޑިޔާރު މުހައްމަދު ފައިސަލް މިދިޔަ ހަފްތާގައި ގާޒީކަމުން އިސްތިއުފާ ދެއްވީ ކޮރަޕްޝަނާއި މަނީ ލޯންޑަރިންގެ ތުހުމަތުތަކާ ގުޅިގެން އެންޓި ކޮރަޕްޝަން ކޮމިޝަން (އޭސީސީ) އިން އޭނާގެ މައްސަލަތަކެއް ތަހުގީގު ކުރަމުން ދަނިކޮށް ކަމަށް ވާއިރު، އޭނާގެ މަނީލޯންޑާގެ މައްސަލަ ސިވިލް ކޯޓުގެ ގާޒީ އައިޝަތު އަޒްފާ އަބްދުލްޣަފޫރާއި ގުޅުން ހުރި ކަމަށް ޚަބަރު ލިބިއްޖެއެވެ.
އަޒްފާ ގެންދަވަނީ ސިވިލް ކޯޓު ފަނށިޔާރެއްގެ ހެދުމުގައި ނާޖާއިޒް ފައިދާތަކެއް ނަންގަވަމުން ކަމަށާއި، މައްސަލަތައް ނިންމެވުމުގައި އަޒްފާ ކޮރަޕްޝަނުގެ ފައިސާ ނަގަނީ ފަނޑިޔާރު ފައިސަލާއި ވެސް ގުޅިގެން ކަމަށް ޚަބަރު ލިބިއްޖެއެވެ. އަނެއްކޮޅުން ފައިސަލަކީ އަޒްފާގެ ފިރިކަލުންނެވެ.
މަސްދަރުތަކުން ހާމަވާ ގޮތުގައި އަޒްފާ ވަނީ އެތައް ބައިވަރު ދަރަނިތަކެއް ނުދައްކައި ހުރި މީހެއްގެ އެޕާޓްމަންޓް ވިއްކާލި މައްސަލައެއްގެ ރިޔާސަތު ބަލަހައްޓައި އަދި އެ މައްސަލައިން މާލީ ފައިދާ ހޯދާފައެވެ. އެޕާޓްމަންޓް ވިއްކި މީހާގެ ވަކީލިގެ ފަރާތުން ފައިސަލް އަށް ފައިސާ ޓްރާންސްފާ ކޮށްފައި ވާއިރު ފައިސަލް ވަނީ އެއިން އަނބިކަނބަލުން (ގާޒީ އަޒްފާ) އަށް އެއިން ބައި އަޅާފައެވެ. އެގޮތުން އަޒްފާގެ އެކައުންޓަށް ފައިސަލް ޓްރާންސްފާކުރި ތަފްސީލުތަކާއި އެކު އެ މުއާމަލާތާ ގުޅޭ އިންޓެލިޖެންސް ރިޕޯޓް ފުލުހުން ވަނީ ތައްޔާރު ވެސް ކޮށްފައެވެ.
ޖުޑީޝަލް ސާވިސް ކޮމިޝަން (ޖޭއެސްސީ) އިން މިހާރު ވަނީ އެ މައްސަލައާ ހަވާލުވެފައެވެ. އެ ދެމަފިރިންގެ ހަރަކާތްތައް ކޮމިޝަނުން ތަހުގީގު ކުރަމުންދާއިރު ފައިސަލް މަގާމުން ވަކިވާތާ ހަފްތާއެއްހާ ދުވަސް ވެއްޖެ އެވެ. ސިވިލް ކޯޓުގެ މައްސަލައިގެ އިތުރުން ދާދި ފަހުން އެ ދެމަފިރިން ވަނީ ޔޫރަޕުގެ އެކި ސިޓީ ތަކަށް ވެސް އަގުބޮޑު ދަތުރުތަކެއް ކޮށްފައެވެ. މިދިޔަ އަހަރު އެކަނިވެސް އެ ދެމަފިރިން ވަނީ 14 ފަހަރު ބައިނަލްއަޤްވާމީ ދަތުރުތަކެއް ކޮށްފައެވެ. އެ ދަތުރުތަކަށް ފައިސާ ދެއްކި ގޮތުގެ ސާފު ޑިޖިޓަލް ހެއްކެް ވެސް ފެންނާކަށް ނެތެވެ.
