އެންޓި-ކޮރަޕްޝަން ކޮމިޝަން (އޭސީސީ)ގެ ނައިބު ރައީސްގެ މަޤާމަށް ޢަބްދުﷲ ނާޝިދު އައްޔަން ކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ހުށަހަޅުއްވައިފިއެވެ.

މިދިޔަ ޖެނުއަރީ 26 ވަނަ ދުވަހު އޭސީސީގެ ނައިބު ރައީސްގެ މަޤާމަށް އަޙްމަދު ނާޝިދުގެ ނަން ރައީސް ހުށަހެޅުއްވި ނަމަވެސް، އިއްޔެ މަޖިލީހަށް ފޮނުއްވި ސިޓީއެއްގައި އެ ނަންފުޅު ބަދަލުކުރައްވަން ނިންމެވި ކަމަށް ވިދާޅުވެފައިވެއެވެ. މިގޮތުން، އަޙްމަދު ނާޝިދުގެ ބަދަލުގައި ޢަބްދުﷲ ނާޝިދު އައްޔަން ކުރެއްވުމަށް ވަނީ ހުށަހަޅުއްވާފައެވެ.

މިދިޔަ އަހަރު އޭސީސީގެ ޤާނޫނަށް ގެނެވުނު އިޞްލާޙާ އެއްގޮތަށް، އޭސީސީގެ ރައީސާއި ނައިބު ރައީސް އައްޔަން ކުރައްވާނީ ރައީސުލްޖުމްހޫރިއްޔާއެވެ. ނަމަވެސް މި ދެ މަޤާމަށް ބޭފުޅުން އައްޔަން ކުރެވޭނީ ރައްޔިތުންގެ މަޖިލީހުގެ ރުހުން ލިބުމުންނެވެ.

ޢަބްދުﷲ ނާޝިދު އޭސީސީގެ މެންބަރުކަމަށް އައްޔަން ކުރެއްވީ މިދިޔަ މަހުގެ 26 ވަނަ ދުވަހުއެވެ.

އޭސީސީގެ ނައިބު ރައީސްގެ މަޤާމަށް ޢަބްދުﷲ ނާޝިދު އައްޔަންކުރެއްވުމަށްޓަކައި، މި މައްސަލަ ދިރާސާކުރުމަށް ވަނީ މަޖިލީހުގެ މިނިވަން މުއައްސަސާތަކުގެ ކޮމިޓީއަށް ފޮނުވާފައެވެ.