އަންނަ ހޮނިހިރު ދުވަހު ދޫކުރަން ހަމަޖެހިފައިވާ އިސްރާއީލުގެ އަސީރުން ދޫކުރުން ފަސްކޮށްލާނެ ކަމަށް ހަމާސްއިން އިޢުލާންކުރުމާއި ގުޅިގެން، އިސްރާއީލުގެ އަސްކަރިއްޔާއިން އެލާޓް ލެވެލް މަތިކޮށްފިއެވެ.

ހަމާސްގެ އިންޒާރުގެ ސަބަބުން އިސްރާއީލުގެ އަސްކަރިއްޔާއިން އަޅާފައިވާ ފިޔަވަޅުތަކުގެ ތެރޭގައި ޗުއްޓީގައި ތިބި ސިފައިންގެ ޗުއްޓީ ކެންސަލްކުރުމާއި، ކަރފިއު ކަނޑައެޅުމާއި، އެލާޓްގެ ލެވެލް މަތިކޮށް ގިނަ ޢަދަދެއްގެ ސިފައިން ޑިއުޓީއަށް ނެރެން ފަށައިފިއެވެ.

ބައެއް ޚަބަރުތައް ބުނާ ގޮތުގައި ރަހީނުން ދޫކޮށްނުލައިފިނަމަ އިސްރާއީލުން އަނެއްކާ ވެސް ޣައްޒާއަށް ބާރުގަދަ ޙަމަލާތައް ދޭން ފަށާނެ ކަމަށް ބެލެވެއެވެ.

ނަމަވެސް ހަމާސްއިން ބުނެފައިވަނީ އިސްރާއީލުން މިހާރު ކުރަމުންދާ ހަނގުރާމައިގެ އެއްބަސްވުމާއި ޚިލާފު ކަންކަމަށް ބަދަލު ދޭންދެން އަސީރުން ދޫކުރުން ފަސްކުރާނެ ކަމަށާއި، އިސްރާއީލުން އެއްބަސްވުމުގެ ޝަރުތުތަކަށް ޢަމަލުކުރާހާ ހިނދަކު، ހަމާސްއިން ވެސް އެއްބަސްވުމަށް ޢަމަލުކުރާނެ ކަމަށެވެ.