ފަތުރުވެރިކަމުގެ ދާއިރާގައި މަސައްކަތްކުރާ މުވައްޒަފުންނަށް ބުރުގާ އެޅުމާއި ތުނބުޅި ބެހެއްޓުން ފަދަ ކަންކަން ހުއްދަކުރުމަށް ގޮވާލައި ރައްޔިތުންގެ މަޖިލީހަށް ކެންދޫ ދާއިރާގެ މަޖިލިސް މެންބަރު މައުރޫފް ޒާކިރު ގަރާރެއް ހުށަހަޅުއްވައިފިއެވެ.

މި ގަރާރުގެ މައިގަނޑު ނުކުތާތަކަކީ:

1. ގާނޫނުއަސާސީގެ 19 ވަނަ މާއްދާއިން ކޮންމެ ރައްޔިތަކަށްވެސް އިސްލާމީ ޝަރީއަތާއި ގާނޫނުގައި މަނާނުކުރާ ކަންކަން ކުރުމުގެ މިނިވަންކަން ލިބިދީފައިވުން.

2. ގާނޫނުއަސާސީގެ 37 ވަނަ މާއްދާއިން ކޮންމެ މީހަކަށްވެސް ބޭނުން ވަޒީފާއެއް އަދާކުރުމުގެ މިނިވަންކަން ލިބިދީފައިވުން.

3. ބައެއް ފަތުރުވެރިކަމުގެ ވިޔަފާރިތަކުގެ ހެދުން އެޅުމުގެ މިންގަނޑުތަކުން ބުރުގާ އެޅުމާއި ތުނބުޅި ބެހެއްޓުމަށް ހުރަސްއެޅޭކަން.

4. މިކަމުގެ ސަބަބުން ބުރުގާ އަޅާ އަންހެނުންނާއި ތުނބުޅި ބަހައްޓާ ފިރިހެނުންގެ ވަޒީފާގެ ހައްގަށް ހުރަސްއެޅޭކަން.

މެންބަރުގެ ގަރާރުގައި ފަތުރުވެރިކަމުގެ ދާއިރާގައި މަސައްކަތްކުރާ މުވައްޒަފުންގެ ހެދުން އެޅުމުގެ އާންމު މިންގަނޑެއް ނުވަތަ އުސޫލެއް އެކުލަވާލުމަށާއި، މި އުސޫލުގެ ދަށުން ބުރުގާ އަޅައިގެންނާއި ތުނބުޅި ބަހައްޓައިގެން މަސައްކަތްކުރުމަށް ހުރި ހުރަސްތައް ނައްތާލުމަށް ސަރުކާރަށް ގޮވައިލެއްވިއެވެ.

މައުރޫފް މަޖިލީހަށް ހުށަހެޅުއްވި ގަރާރުގައި ބުނެފައި ވަނީ އިސްލާމީ ޝަރީއަތުގައި ނުވަތަ ގާނޫނުގައި ކަނޑައެޅިގެން މަނާކޮށްފައި ނުވާ ކޮންމެ ކަމެއް ކުރުމުގެ މިނިވަންކަން ގާނޫނުއަސާސީގެ 19 ވަނަ މައްދާއިން ދިވެހި ކޮންމެ ރައްޔިތަކަށް ވެސް ކަށަވަރު ކޮށްދީފައިވާ ކަމަށާއި އެމީހަކު ބޭނުން ވަޒީފާއެއް އަދާ ކުރުމުގެ މިނިވަންކަން ގާނޫނުއަސާސީގެ 37 ވަނަ މާއްދާއިން ކަށަވަރު ކޮށްދީފައިވާ ކަމަށެވެ.