ސަރުކާރުގެ އިޤްތިޞާދީ އިޞްލާޙީ އެޖެންޑާގެ ދަށުން، ދައުލަތުގެ ޚަރަދުތައް ކުޑަކުރުމުގެ މަޤްޞަދުގައި، ކުރިއަށް އޮތް ދެއަހަރު ދުވަހުގެ މުއްދަތަކަށް އެޅުމަށް ނިންމާފައިވާ ފިޔަވަޅުތަކަށް ރުހުން ހޯދުމަށް ރައްޔިތުންގެ މަޖިލީހަށް ފޮނުވައިފިއެވެ.

މާދަމާ ފެށޭ މި އަހަރުގެ ފުރަތަމަ މަޖިލިސް ޖަލްސާގެ އެޖެންޑާގައި މި މައްސަލަ ހިމެނިފައިވާ ކަމަށް މަޖިލީހުގެ އިދާރާއިން މިއަދު ހާމަކޮށްފައިވެއެވެ.

ރައީސް މުޢިއްޒު މިދިޔަ އަހަރުގެ އޮކްޓޯބަރު މަހު އިޢުލާންކުރެއްވި ގޮތުގައި، މި ފިޔަވަޅުތަކުގެ ތެރޭގައި ހިމެނެނީ:

1. ސިޔާސީ މަޤާމުތަކުގައި ތިއްބަވާ ބޭފުޅުންގެ މުސާރައިން 10% އުނިކުރުން،

2. ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން 10% އުނިކުރުން އަދި ކުންފުނިތަކުގެ ވެރިންގެ މުސާރަ 90,000 ރުފިޔާއަށްވުރެ ބޮޑު ނުކުރުން،

3. މިނިވަން މުއައްސަސާތަކުގެ އިސްވެރިންގެ މުސާރައިން 10% އުނިކުރުމަށް ހުށަހެޅުން،

4. ޝަރުޢީ ދާއިރާގެ އިސްވެރިންނާއި ރައްޔިތުންގެ މަޖިލީހުގެ މެންބަރުންގެ މުސާރައިން 10% އުނިކުރުމަށް އެދުން

ނަމަވެސް، 12,000 ރުފިޔާއަށްވުރެ ދަށުން މުސާރަ ލިބޭ ފަރާތްތައް މި ފިޔަވަޅުތަކުން އިސްތިސްނާ ކުރެވޭނެކަމަށް ރައީސް ވަނީ ވިދާޅުވެފައެވެ.

މި ފިޔަވަޅުތަކަކީ ރާއްޖެއަށް ކުރިމަތިވެފައިވާ އިޤްތިޞާދީ އަދި މާލީ ގޮންޖެހުންތަކުން އަރައިގަތުމަށް އެޅޭ ފިޔަވަޅުތަކެއްގެ ގޮތުގައި ސަރުކާރުން ބުންޏެވެ. މީގެ ކުރިން ވެސް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ވަނީ ސަރުކާރުގެ ވިޔަފާރި ތަންތަނާއި ހިއްސާވާ ކުންފުނިތަކުގެ ޚަރަދު ކުޑަކުރުމަށް ފިޔަވަޅުތަކެއް އަޅަން އަންގާފައެވެ.