މިއަދު ބޭއްވި ބައި އިލެކްޝަންގައި ޕީއެންސީއަށް ލިބުނު ކާމިޔާބީއަށް ރައީސްގެ މަރުހަބާ ވިދާޅުވެއްޖެއެވެ.

ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް މެންބަރުން ހޮވުމަށް މިއަދު ބޭއްވުނު ބައި އިލެކްޝަންގައި ވެރިކަންކުރާ ޕީއެންސީން ވަނީ ބޮޑު ކާމިޔާބެއް ހޯދައިފައެވެ.

މި އިންތިޚާބުގައި ވާދަކުރި 37 ގޮނޑީގެ ތެރެއިން 33 ގޮނޑި ޕީއެންސީން ކާމިޔާބުކުރިކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ބައި އިލެކްޝަނާއި ގުޅިގެން ސޯޝަލް މީޑިއާގައި ރައީސުލްޖުމްހޫރިއްޔާ ހިއްސާކުރެއްވި ޕޯސްޓުގައި ވިދާޅުވެފައިވަނީ 37 ގޮނޑީގެ ތެރެއިން އިންތިޚާބަކާ ނުލައި 24 ގޮނޑި އަދި އިންތިޚާބުގައި ވާދަކޮށްގެން 9 ގޮނޑި ކާމިޔާބުކޮށް، ޖުމްލަ 33 ގޮނޑި ޕީއެންސީއަށް ލިބިފައިވާ ކަމަށެވެ. މީގެ ތެރޭގައި އަތޮޅު ކައުންސިލް ރައީސް ކަމުގެ 1 ގޮނޑި އާއި، ރަށު ކައުންސިލް ރައީސް ކަމުގެ 1 ގޮނޑި އާއި، ރަށު ކައުންސިލް މެންބަރު ކަމުގެ 2 ގޮނޑި އާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ 29 ގޮނޑި ހިމެނެއެވެ.

މި ކާމިޔާބީ އާއި ގުޅިގެން ރައީސުލްޖުމްހޫރިއްޔާ ވަނީ މާތްﷲ އަށް ޙަމްދުކުރައްވައި، އިންތިޚާބު ކާމިޔާބުކުރެއްވި ކެންޑިޑޭޓުންނަށް މަރުޙަބާ ވިދާޅުވެފައެވެ. އަދި އިންތިޚާބު ކާމިޔާބުކޮށްދެއްވުމަށް މަސައްކަތް ކޮށްދެއްވި ފަރާތްތަކަށާއި، ވޯޓުގައި ބައިވެރިވި ރައްޔިތުންނަށް ޝުކުރު އަދާކުރައްވާފައި ވެއެވެ.

މި ބައި އިލެކްޝަންގެ ނަތީޖާއިން ދައްކުވައިދެނީ ވެރިކަންކުރާ ޕީއެންސީއަށް ރައްޔިތުންގެ ތާއީދު އިތުރުވެފައިވާކަމެވެ.