ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި ރިޔާސީ ބަޔާނުގައި ޤައުމިއްޔަތާއި، މިނިވަންކަން ނަގަހައްޓައި، ތަރައްޤީގެ ފުރިހަމަ ޔަގީންކަން ދެއްވާފައިވާކަމަށް ރައީސުލްޖުމްހޫރިއްޔާގެ އޮފީހުގެ އަންޑަރ ސެކެޓްރީ ފޮރ ޕަބްލިކް ޕޮލިސީ މުޙައްމަދު ފިރުޒުލް ވިދާޅުވެއްޖެއެވެ.

ބުރާސްފަތި ދުވަހު އިއްވެވި ރިޔާސީ ބަޔާނާއި ގުޅިގެން ދައުލަތުގެ މީޑިއާ ޕްރޮގްރާމެއްގައި ވާހަކަދައްކަވަމުން، ފިރުޒުލް ވިދާޅުވީ ރިޔާސީ ބަޔާނުގައި ޤައުމިއްޔަތަށް އިސްކަންދިނުމާއި، ޑިޖިޓަލައިޒޭޝަނާއި، ޚާރިޖީ ސިޔާސަތާއި، އަދި ތަރައްޤީގެ ސިޔާސަތުތަކަށް އަލިއަޅުވާލާފައިވާ ކަމަށެވެ.

"އަދުގެ ސަރުކާރުން ޤައުމިއްޔަތަށް ދެއްވާ އިސްކަން ރިޔާސީ ބަޔާނުން ފާހަގަކުރެވޭނެ. ޤައުމީ ތަރިކަ ދިރުވައި އާލާކުރުމުގައި ޑިޖިޓަލައިޒޭޝަނަށް އިސްކަން ދިނުމުގެ މަސައްކަތްތައް ވަނީ ފެށިފައި،" ފިރުޒުލް ވިދާޅުވިއެވެ.

ފިރުޒުލް އިތުރަށް ވިދާޅުވީ، ޤައުމުގެ ސިޔާދަތީ މިނިވަންކަމަށް ރައީސް ދެއްވާ އިސްކަން ރިޔާސީ ބަޔާނުން ފާހަގަވެގެން ދިޔަ ކަމަށެވެ. އަދި ދިވެހި ޚާރިޖީ ސިޔާސަތުގައި އެންމެ އިސްކަމެއް ދެއްވާނީ ދިވެހިންނަށް ލިބިދޭ މިނިވަންކަމާއި އެއްގޮތަށް އެހެން ޤައުމުތަކުގެ ރައްޔިތުންނަށް ވެސް އެކަން ކަށަވަރު ކުރުމަށެވެ.

ތަރައްޤީގެ ދާއިރާއިން ގިނަ މަޝްރޫޢުތަކެއްގެ މަޢުލޫމާތު ރިޔާސީ ބަޔާނުގައި ހިއްސާކުރައްވާފައި ވާކަން ފިރުޒުލް ފާހަގަކުރެއްވިއެވެ. "2040 ވަނަ އަހަރު އަންނައިރު ދިވެހިރާއްޖެ ތަރައްޤީވެފައިވާ ޤައުމަކަށް ހެދުމަށް ރައީސުލްޖުމްހޫރިއްޔާ ގެންގުޅުއްވާ ތަޞައްވުރަށް ވާސިލްވުމަށް ކުރަންހުރި މަސައްކަތްތައް ރިޔާސީ ބަޔާނުން ފާހަގަވެގެން ދިޔަ،" ފިރުޒުލް ވިދާޅުވިއެވެ.

އެގޮތުން، ރިޔާސީ ބަޔާނުގައި ރައީސުލްޖުމްހޫރިއްޔާ ވިދާޅުވެފައިވަނީ މިއަހަރު ތަރައްޤީއާ ގުޅޭ 1000 އަށްވުރެ ގިނަ މަޝްރޫޢުތައް ކުރިއަށް ގެންދެވޭނެ ކަމަށެވެ. މީގެ ތެރޭގައި ފެނާއި ނަރުދަމާއާއި، ސްކޫލް ޢިމާރާތްތަކާއި، ސިއްޙީ މަރުކަޒުތަކާއި، ކުޅިވަރުކުޅޭ ތަންތަން ތަރައްޤީކުރުމުގެ މަޝްރޫޢުތައް ހިމެނެއެވެ.

މީގެއިތުރުން، ޤައުމީ ތަރައްޤީގެ މަސައްކަތުގައި ހުރިހާ ރައްޔިތުންގެ އެއްބާރުލުން ބޭނުންވާނެ ކަމަށް ވެސް ފިރުޒުލް ވިދާޅުވިއެވެ.