އިޓާލިއަން ސެރީއާގައި ޔުވެންޓަސްއާއި ދެކޮޅަށް ކުޅުނު މެޗުގައި 2-1 އިން ބަލިވުމަށްފަހު، ޕެނަލްޓީއެއް ނުދިނުމާއި ގުޅިގެން ކޯމޯގެ ކޯޗު ސެސްކް ފާބްރެގާސް ވަރަށް ރުޅި އައިސް ފާޑުކިޔައިފިއެވެ.

ކޯމޯ އިއްޔެ ބަލިވީ ޔުވެންޓަސް އާއި ކުޅެ 2-1 ލަނޑުންނެވެ. 24 މެޗުން 22 ޕޮއިންޓާއެކު 15 ވަނައިގައި އޮތްއިރު އެންމެ ފަހުން ކުޅުނު 3 މެޗުން ވެސް ކޯމޯ ވަނީ ބަލިވެފައެވެ.

އިއްޔެ ފާބްރެގާސް ބުނީ ކޯމޯގެ ކުޅުންތެރިޔާ މަސައްކަތްކުރި ބޯޅައަށް ހުރަސް އެޅުނީ ޔުވެންޓަސްގެ ޑިފެންޑަރު ގެޓީ އަތުގައި ބޯޅަ ޖެހުމުންނެވެ. މި ހާދިސާގައި ވީއޭއާރުން އެއްވެސް ފިޔަވަޅެއް ނޭޅުމުން، އޭނާގެ ހިތުގައި ޝައްކު އުފެދިފައިވާ ކަމަށް މީޑިއާގައި ބުންޏެވެ.

"ޕެނަލްޓީއެއް ދޭންޖެހޭ. އެކަމާމެދު އެއްވެސް ޝައްކެއް ނެތް. ޑޮވިކާސް ބޯޅަ ކޮންޓްރޯލްކުރަނީ މޭމަތިން، އަދި ގެޓީގެ އަތުގައި ބޯޅައަށް ނުޖެހުނު ނަމަ، އޭނާއަށް ގޯލަށް ދެވުނީސް،" ފާބްރެގާސް ބުނެފައިވެއެވެ.

ފާބްރެގާސް ބުނީ މިފަދަ ކަންކަން ތަކުރާރުވަމުންދާ ކަމަށާއި، މީގެ ކުރިން ވެސް ލާޒިއޯ، މިލާން އަދި ރޯމާއާ ދެކޮޅަށް ކުޅުނު މެޗުތަކުގައި ކޯމޯއަށް ގެއްލުންވާ ގޮތަށް ނިންމުންތައް ނިންމާފައިވާ ކަމަށެވެ.

ފާބްރެގާސް ބުނީ ވީއޭއާރު ރަނގަޅަށް ބޭނުންކުރާ ނަމަ، އޭނާ އެ ނިޒާމަށް ތާއީދުކުރާ ކަމަށެވެ. ނަމަވެސް މިހާރު ދިމާވަމުންދާ ހަމަހަމަ ނޫން ނިންމުންތައް ނިންމުމުގެ ސަބަބުން ވީއޭއާރަކީ ފުޓްބޯޅައަށް ނުރަނގަޅު އެއްޗަކަށް ވަމުންދާ ކަމަށް އޭނާ ބުންޏެވެ.

ޔުވެންޓަސް ޑިފެންޑަރު ގެޓީ ބުނީ އޭނާ އަތް އެޅީ ކުޅުންތެރިޔާއަށް ހުރަސްއެޅުމަށް ކަމަށާއި، ބޯޅައަށް ނޫން ކަމަށެވެ. އަދި މިފަދަ ކުދިކުދި ކަންކަމަށް ޕެނަލްޓީ ދިނުމަކީ އޭނާ ބޭނުންވާ ކަމެއް ނޫން ކަމަށާއި، އެއީ ޔުވެންޓަސްއަށް ވިޔަސް އަދި އެހެން ޓީމަކަށް ވިޔަސް ކަމަށް ގެޓީ ބުނެފައިވެއެވެ.

ގެޓީ ބުނީ މިފަދަ ކުދިކުދި ކަންކަމަށް ޕެނަލްޓީ ދޭން ފެށުމުން ޑިފެންޑަރުންނަށް އެއްވެސް އެހީތެރިކަމެއް ނުލިބޭ ކަމަށެވެ. "މިހާރު މިކަހަލަ ކޮންމެ ކުޑަ އަތްލުމަކަށް ޕެނަލްޓީ ދޭން ފަށައިފިއްޔާ، އަޅުގަނޑުމެން ފުޓްބޯޅަ ކުޅުން ހުއްޓާލަން ޖެހޭނެ،" ގެޓީ ބުނެފައިވެއެވެ.