ފަހު ސިކުންތުގައި ޔުނައިޓެޑުން މޮޅުވެއްޖެ

މެންޗެސްޓަރ ޔުނައިޓެޑް ލެސްޓަރ ސިޓީ 2-1 އިން ބަލިކޮށް އެފްއޭ ކަޕްގެ ފަސްވަނަ ބުރަށް ދަތުރުކޮށްފިއެވެ.

އޯލްޑް ޓްރެފަޑްގައި ކުޅުނު މި މެޗުގައި ޔުނައިޓެޑްގެ ގޯލުތައް ޖެހީ ޖޮޝުއާ ޒަރކީއާއި ހެރީ މަގުއާ އެވެ.

މެޗުގެ ފުރަތަމަ ހާފު ލެސްޓަރ ސިޓީން ކުރި ހޯދި ނަމަވެސް،، ދެވަނަ ހާފުގައި ޔުނައިޓެޑް ވަނީ ނަތީޖާ އަނބުރާލާފައެވެ. ޔުނައިޓެޑުން މެޗުގެ އެންމެ ފަހު ސިކުންތުތަކުގައި މެގުއާ ގޯލު ޖެހީ އޭނާގެ ކުރީގެ ޓީމާ ދެކޮޅަށެވެ.

މެޗަށްފަހު ލެސްޓަރ ސިޓީގެ މެނޭޖަރ ރޫޑް ވަން ނިސްޓަލްރޯއި ވަނީ ޔުނައިޓެޑް މޮޅުވި ގޯލަކީ އޮފްސައިޑް ގޯލެއް ކަމަށް ބުނެފައެވެ.

ދުނިޔޭގެ އެންމެ އަގުބޮޑު ޑިފެންޑަރުގެ ގޮތުގައި ޔުނައިޓެޑާއި މެގުއާ ގުޅުނީ މީގެ 5 އަހަރު ކުރިންނެވެ. އޭނާ ރޭ މި ލަނޑު ޖެހީ އޮފްސައިޑް މަގާމެއްގައި ހުރެކަން ސާފުކޮށް ވީޑިއޯ އިން ފެނެއެވެ. ނަމަވެސް، އެފްއޭ ކަޕްގައި ވީޑިއޯ އެސިސްޓަންޓް ރެފްރީ (ވީއޭއާރް)ގެ ބޭނުން ނުކުރެއެވެ. އަދި ލައިންސްމަން އޮފްސައިޑް ކަމަށް ނުނެގުމުން މި ގޯލު ވަނީ ބަލައިގަނެފަ އެވެ.

މި ލަނޑު ބަލައިގަތުމުން ލެސްޓާގެ ވަގުތީ ކޯޗު ރޫޑް ވެން ނިސްޓެލްރޫއީ ވަނީ ވަރަށް ބޮޑަށް ފާޑު ކިޔާފައެވެ.

މި ނަތީޖާއާއެކު ޔުނައިޓެޑް ވަނީ ވޭތުވެދިޔަ 11 ސީޒަނުގެ ތެރެއިން 10 ސީޒަނެއްގައި އެފްއޭ ކަޕްގެ ފަސްވަނަ ބުރަށް ދަތުރުކޮށްފައެވެ.