އިނގިރޭސި ޕްރިމިއަރ ލީގުގައި އާދިއްތަ ދުވަހުގެރޭ މެންޗެސްޓަރގެ ދެ ކުލަބު ކަމަށްވާ ސިޓީ އަދި ޔުނައިޓެޑުގެ ކުރިމަތިލުން ގޯލެއް ނުޖެހި އެއްވަރުވެއްޖެއެވެ.

ދެ ޓީމުގެ ފަރާތުންވެސް ދަށް ކުޅުމެއް ފެނިގެންދިޔަ މި މެޗުގެ ފުރިހަމަ ފައިދާ ނަގައި ޗެލްސީން ވަނީ ޓޮޓްނަމް 0-1 ގެ ނަތީޖާއިން ބަލިކޮށް 53 ޕޮއިންޓާއެކު ތާވަލުގެ ހަތަރު ވަނައަށް ޖެހިލާފައެވެ. މެޗުން ލިބުނު އެއް ޕޮއިންޓާއެކު ސިޓީ ވަނީ ތާވަލުގެ ފަސް ވަނައަށް ވެއްޓިފައެވެ. އަދި ޓޮޓްނަމް ބަލިވުމުގެ ފައިދާ ނަގައި ޔުނައިޓެޑުން ވަނީ ތާވަލުގެ 13 ވަނައަށް ޖެހިލާފައެވެ.

އަލެޖެންޑްރޯ ގާނާޗޯ އަށް ލިބުނު ފުރުސަތެއް ގެއްލުނުއިރު، މެނުއަލް އުގާޓޭ ފޮނުވާލި ބޯޅަ އަމާޒު ނުވެ މާ ބޭރަށް ދިޔަކަން ފާހަގަކުރެވުނެވެ. ބަދަލު ކުޅުންތެރިޔާ ޖޯޝުއާ ޒިރްކްޒީގެ ބޯޅަ އެޑަރސަން ދިފާއުކުރިއިރު އެ ބޯޅައިގައި ބާރެއް ނެތެވެ.

ސިޓީއަށް ވެސް އުނދަގޫތަކެއް ކުރިމަތިވީ ހާލަންޑް ނެތުމުންނެވެ. އުމަރު މާމޫޝް އަށް ވެސް ނުރައްކާ ވާކަހަލަ ބޯޅައެއް ފޮނުވާނުލެވުނުއިރު، ކެވިން ޑިބްރޭނާގެ 7 އަހަރުގެ ކެރިއަރުގައި އޭނާގެ ކުޅުން މިހާބޮޑަށް ވަނދުކޮށް ދިޔަ މެޗެއް ނުފެނެއެވެ.

^{ޑިބްރޭބާއަށް މެންޗެސްޓާ ޔުނައިޓެޑްގެ ހެރީ މެގުއާ ހުރަސް އަޅަނީ: އެންމެ ޗާންސެއް ވެސް ރޭ ޑިބްރޭނާއަށް ކްރިއޭޓް ނުކުރެވުނު.}

ޑިބްރޭނާގެ އެންމެ ފަހުގެ މެންޗެސްޓާ ޑާބީއަކީ ލޮނުމަޑު މެޗެއް ކަމަށާއި، ބެލްޖިއަމްގެ ކުޅުންތެރިޔާއަށް މިއީ ހުތުރު އަލްވަދާޢެއް ކަމަށް ބުނެ މީޑިއާގައި ފާޑުކިޔާފައި ވެއެވެ.

ރޭގެ މެޗުގައި އެންމެ ރަނގަޅަށް ކުޅުނީ ބްރޫނޯ ފަރްނާންޑޭސްއެވެ. ކަސެމީރޯ ވެސް މޮޅު ކުޅުމެއް ދެއްކިއެވެ.

ފަހުގެ ތާރީހެއްގައި މެންޗެސްޓަރ ޔުނައިޓެޑުގެ އެންމެ ދަށް ކުޅުމެއް ފެނިގެންދާ މި ސީޒަނަކީ 90-1989 އަށް ފަހު އެޓީމު ތާވަލުގެ 12 އަށް ވުރެ ދަށަށް ވެއްޓޭނެ ފުރަތަމަ ސީޒަނަށް ވެގެންދިޔުމަކީ އެކަށީގެންވާ ކަމެކެވެ. އެލެކްސް ފާގަސަންގެ ކޯޗު ކަމުގެ ދަށުން އެޓީމު އެސީޒަނުގައި ލައްވާލީ ތާވަލުގެ 13 ވަނައަށެވެ.

ހަމަ އެހެންމެ އެންމެ ފަހުން މެންޗެސްޓަރ ސިޓީ ތާވަލުގެ 4 ވަނައަށް ވުރެ ދަށަށް ވެއްޓިފައިވަނީ 10-2009 ގެ ސީޒަނުގައެވެ. އެހެން ކަމުން ބާކީ އޮތް 7 މެޗަކީ އެ އެޓީމުގެ ކޯޗު ގުއާޑިއޯލާ އަށް ކުރިމަތިވެފައިވާ ބޮޑު އިމްތިހާނެކެވެ.

މި ސީޒަނުގެ ތަށި ނަގާނެ ކަމަށް ބެލެވިފައިވާ ލިވަޕޫލުން ތަށި ޔަޤީން ކުރުމަށްޓަކައި ބާކީ ހޯދަން ޖެހޭނީ 11 ޕޮއިންޓެވެ. ތާވަލުގެ ދެވަނައިގައި އޮތް އާސެނަލާއި ލިވަޕޫލް، 11 ޕޮއިންޓުގެ ފަރަގެއް އެބައޮތެވެ.