ދުނިޔޭގައި އެންމެ ގިނަ ބަޔަކު އިންތިޒާރު ކުރަމުން އައި ޕްރިމިއަރ ލީގު މި ހަފްތާގައި ފަށާފައިވާއިރު މިފަހަރުގެ ސީޒަން ވެސް މި ލީގުގެ އެންމެ ކާމިޔާބު ކުލަބު ކަމައްވާ މެންޗެސްޓަރ ޔުނައިޓެޑް ފަށާފައިވަނީ ނާއުއްމީދާ އެކީގައެވެ.
ހޮނިހިރު ދުވަހުގެ ހަވީރު ލިވަޕޫލާއި ބޯންމައުތުގެ މެޗުން ލީގު ފަށާފައިވާއިރު އެންމެ ފަހުގެ ޗެމްޕިއަން ލިވަޕޫލުން މި މެޗު ކާމިޔާބު ކުރީ 2-4 ގެ ނަތީޖާއިންނެވެ. އެ ދުވަހުގައި ދެން ކުޅުނު މެޗުތަކަށް ބަލާއިރު ނިއުކާސަލާއި އެސްޓަން ވިލާ ބައްދަލުކުރި މެޗު ގޯލެއް ނުޖެހި އެއްވަރުވެފައިވާއިރު ޓޮޓެންހަމް އަދި ބާންލީ ކުޅުނު މެޗު ޓޮޓެންހަމުން ކާމިޔާބުކޮށްފައިވަނީ 0-3 ގެ ނަތީޖާއިންނެވެ. ވެސްޓްހަމްގެ މައްޗަށް 0-3 ގެ ނަތީޖާއަކުން ސަންދަރލެންޑު މޮޅުވެފައިވާއިރު ބްރައިޓަން އަދި ފުލަމް ބައްދަލުކުރި މެޗު ނިމުނީ 1-1 ނަތީޖާއިން އެއްވަރުވެގެންނެވެ. އެ ދުވަހު ކުޅުނު ފަހު މެޗު ވުލްވްސް މައްޗަށް މެންޗެސްޓަރ ސިޓީން ކުރި ހޯދާފައިވަނީ 0-4 ގެ ނަތީޖާއިންނެވެ.
އާދީއްތަ ދުވަހު ތިން މެޗު ކުޅެފައިވާއިރު ނޮޓިންހަމް އަދި ބްރެންޓްފޯޑު ބައްދަލުކުރި މެޗު ނޮޓިންހަމުން ކާމިޔާބުކުރީ 1-3 ގެ ނަތީޖާއަކުންނެވެ. ފީފާ ކުލަބު ވޯލްޑް ކަޕުގެ ޗެމްޕިއަން ޗެލްސީ ފުރަތަމަ މެޗުގައި ބައްދަލުކުރީ ކްރިސްޓަލް ޕެލެސްއާ އެވެ. މި މެޗު ނިމުނީ ގޯލެއް ނުޖެހި އެއްވަރުވެގެންނެވެ. ފުރަތަމަ ހަފްތާގައި އެންމެ ފޯރިގަދަ މެޗަކަށް ކުޅުނީ މުބާރާތުގެ އެންމެ ކާމިޔާބު ކުލަބު ކަމަށްވާ މެންޗެސްޓަރ ޔުނައިޓެޑާއި އާސެނަލް ބައްދަލުކުރި މެޗެވެ. މެޗުގެ ކުރީކޮޅުގައި އާސެނަލުން ގޯލެއް ޖަހައި މެޗު ކާމިޔާބުކޮށްފައިވަނީ 0-1 ގެ ނަތީޖާއަކުންނެވެ.
ފުރަތަމަ ހަފްތާގެ އެންމެ ފަހު މެޗަކަށް ކުޅެފައިވަނީ ހޯމަ ދުވަހުގެ ރޭ ލީޑްސް ޔުނައިޓެޑާއި އެވަޓަން އެވެ. 0-1 ގެ ނަތީޖާއިން މެޗު ކާމިޔާބުކޮށްފައިވަނީ ލީޑްސް ޔުނައިޓެޑެވެ.
ލީގުގެ އެއްވަނައިގައި ސިޓީ އޮތީ ޖުމްލަ ހަތަރު ގޯލުގެ ތަފާތު އޮވެގެންނެވެ. ކޮންމެއަކަސް ފުރަތަމަ ހަފްތާ ނިމުނު އިރު މިއީ ޔުނައިޓެޑުގެ ސަޕޯޓަރުންނަށް ގަބޫލުކުރަން ދަތި ނަތީޖާއެކެވެ. އެ ކުލަބުގެ ސަޕޯޓަރުން މި ސީޒަނާ ކުރިމަތިލީ ވަރަށް ފޮނި އުންމީދުތަކާ އެކުގައެވެ. ލީގުގައި އަދި ބާކީ 37 މެޗު އެބައޮތެވެ. އެހެންކަމުން ބަލަމާ ހިނގާށެވެ.
