ދަނޑުވެރިކަމަށް ޚާއްސަ އިޤްތިޞާދީ ޒޯނެއް މިއަހަރު ތެރޭގައި ޤާއިމްކުރެވި، ކާނާގެ ރައްކާތެރިކަން ކަށަވަރުކުރުމަށް ޚާއްސަ މަޝްރޫޢުއެއް ފެށިގެންދާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރަށް މަޖިލިސް ހުޅުވުމަށް ބޭއްވި ޖަލްސާގައި ރައީސް އިއްވެވި ރިޔާސީ ބަޔާނުގައި، ރާއްޖޭގެ ބިމުން އިޤްތިޞާދު ބިނާކުރުމަށްޓަކައި މިއަހަރުގެ ތެރޭގައި ދަނޑުވެރިކަމަށް ޚާއްސަ މަސައްކަތްތަކެއް ފެށިގެންދާނެކަމަށް ވިދާޅުވިއެވެ. އެގޮތުން، ދަނޑުވެރިކަމަށް ޚާއްސަ އިޤްތިޞާދީ ޒޯނެއް ޤާއިމްކުރެވި، އެ ސިނާޢަތުގެ މަސައްކަތްތައް ފުޅާކުރެވިގެންދާނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ، ރާއްޖޭގެ ދަނޑުވެރިކަމުގެ ދާއިރާގައި ކުރިމަތިވެފައިވާ އެންމެ ބޮޑު ގޮންޖެހުމަކީ ކާނާގެ ރައްކާތެރިކަން ކަށަވަރުކުރުމަށް ހުރި ހުރަސްތައް ކަމަށެވެ. މިކަމަށް ޙައްލެއް ހޯދުމަށްޓަކައި، ރާއްޖޭގައި އުފެއްދޭ މައިގަނޑު ބާވަތްތަކުން ކާނާގެ ރައްކާތެރިކަން ކަށަވަރު ކުރެވޭ މިންވަރަށް ޚާއްސަ މަޝްރޫޢުއެއް މިއަހަރު ފެށިގެންދާނެ ކަމަށް ރައީސް ވިދާޅުވިއެވެ. މި މަޝްރޫޢު 2028 ވަނަ އަހަރަށް ނިމި، އޭގެ ފައިދާ ރާއްޖޭގެ އިޤްތިޞާދަށް ލިބިގެންދާނެކަމަށްވެސް ރައީސް ފާހަގަކުރެއްވިއެވެ.

"ފާއިތުވި ޕެންޑަމިކްގެ ތެރޭގައިވެސް އެންމެ ބޮޑަށް ކުރިމަތިވި އެއް ގޮންޖެހުމަކީ ރައްޔިތުންނަށް ބޭނުންވާ މިންވަރަށް ކާނާގެ ރައްކާތެރިކަން ކަށަވަރުކުރުމުގައި ދިމާވި ދަތިތައް. މިކަމަށް ދާއިމީ ޙައްލެއް ހޯދުމަކީ އަޅުގަނޑުމެންގެ ސަރުކާރުގެ އިސް އަމާޒެއް." ރައީސް ވިދާޅުވިއެވެ.

މި މަޝްރޫޢުގެ ސަބަބުން، މުސްތަޤްބަލުގައި ރާއްޖެއިން ބޭރުން އެތެރެކުރާ ކާނާގެ ބާވަތްތަކަށް ބަރޯސާވުން ކުޑަކުރެވި، ދިވެހި އުފެއްދުންތެރިކަން އިތުރުވެ، ކާނާގެ ރައްކާތެރިކަން ކަށަވަރުވެގެންދާނެ ކަމަށް ރައީސް ވިދާޅުވިއެވެ. އަދި ރާއްޖޭގެ އިޤްތިޞާދުގެ މައިގަނޑު އެއް އަސާސަކަށް ދަނޑުވެރިކަމުގެ ސިނާޢަތް ވެގެންދާނެ ކަމަށްވެސް ރައީސް ފާހަގަކުރެއްވިއެވެ.