Airport ge seaplane terminal in foshigandeh vagah negi meehaku hoadhanee

ޚުލާސާ

އެ މީހާ ފޮށިގަނޑު ވަގަށް ނަގައިގެން ގެންދާ މަންޒަރު ފެންނަ ސީސީޓީވީ ފުޓޭޖު ފުލުހުން ވަނީ އާންމުކޮށްފައި.

ވެލާނާ އިންޓަނޭޝަނަލް އެއާޕޯޓުގެ ސީޕްލޭން ޓާމިނަލްގެ ކައުންޓަރު ކައިރީގައި ހުރި ފޮށިގަނޑެއް ވަގަށް ނެގި މީހަކު ހޯދަން ފުލުހުން މިއަދު އިޢުލާނުކޮށްފިއެވެ.

އެ މީހާ ފޮށިގަނޑު ވަގަށް ނަގައިގެން ގެންދާ މަންޒަރު ފެންނަ ސީސީޓީވީ ފުޓޭޖު އާންމުކޮށް، އެ މީހާ ހޯދުމަށް އާންމުންގެ އެހީތެރިކަމަށް ފުލުހުން ވަނީ މިއަދު އެދިފައެވެ.

ފުލުހުން ބުނީ އެ ވީޑިއޯގައި ފެންނަ މީހާއަކީ އެއާޕޯޓް ޕޮލިސް އިންވެސްޓިގޭޝަނުން ތަޙުޤީޤުކުރާ މައްސަލައެއްގައި ހޯދަމުން އަންނަ މީހެއް ކަމަށާއި އެކަން ހިނގާފައި ވަނީ މިދިޔަ އަހަރުގެ ނޮވެމްބަރު މަހުގެ 23 ވަނަ ދުވަހު ކަމަށެވެ.

އޭނާ ހޯދަން އިޢުލާނުކުރީ ސީޕްލޭން ޓާމިނަލްގެ ކައުންޓަރު ކައިރީގައި ހުރި ފޮށިގަނޑެއް ވަގަށް ނަގާފައިވާ މައްސަލައާ ގުޅިގެން ކަމަށް ފުލުހުން ބުންޏެވެ.

ފުލުހުން ބުނީ އެ މީހާއަކީ ހޯދަން ބޭނުންވެ، އެއީ ކާކުކަން ދެނެގަނެވިފައި ނުވާތީ ހޯދިފައި ނުވާ ކަމަށެވެ.

ވީޑިއޯ އިން ފެންނަ މީހާއާ ބެހޭ އެއްވެސް މަޢުލޫމާތެއް އެނގޭ ނަމަ، ވިލިމާލެ ޕޮލިސްގެ ނަންބަރު 9400056 އަށް ގުޅައި ހިއްސާކުރުމަށް ފުލުހުން ވަނީ އެދިފައެވެ.