ޣައްޒާގެ ފަލަސްތީނު ރައްޔިތުންނާއި އީރާނާއި ބެހޭ ގޮތުން ސަމާލުކަން ހޯދާފަދަ ވާހަކަފުޅުތަކެއް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ. މި ވާހަކަފުޅުތަކުގައި ޣައްޒާގެ ރައްޔިތުން ބަދަލުކުރުމާއި އީރާން ނައްތާލުމުގެ ވާހަކަ ހިމެނެއެވެ.

ޓްރަމްޕް ވިދާޅުވެފައިވަނީ ފަލަސްތީނުގެ ރައްޔިތުން އަވައްޓެރި ޤައުމުތަކަށް ބަދަލުކޮށް، ޣައްޒާ ސަރަހައްދު އެމެރިކާގެ ބެލުމުގެ ދަށަށް ގެނެސް، "ދުނިޔޭގެ ރައްޔިތުން" އެތަނުގައި އުޅޭނެ ގޮތަށް ތަރައްޤީކުރަން ބޭނުންވާ ކަމަށެވެ. މިގޮތަށް ޓްރަމްޕްނވާހަކަފުޅުތައް ދެއްކެވީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ އެކު ބޭއްވި ނޫސްވެރިންގެ ބައްދަލުވުމެއްގައެވެ.

މީގެ އިތުރުން، ޓްރަމްޕް ވިދާޅުވީ އޭނާ މަރާލައިފިނަމަ އީރާން ނައްތާލުމަށް އޭނާގެ އެޑްވައިޒަރުންނަށް އިރުޝާދު ދީފައިވާ ކަމަށެވެ. މިއީ ބައިނަލްއަޤްވާމީ މުޖުތަމަޢުގެ ސަމާލުކަން ހޯދާފައިވާ ވާހަކަތަކަކަށް ވެއްޖެއެވެ.

ޓްރަމްޕްގެ މި ވާހަކަފުޅުތަކަށް ހަމާސް އިން ވަނީ ރައްދު ދީފައެވެ. ހަމާސް އިން ބުނީ ޓްރަމްޕްގެ ރޭވުންތަކަކީ ސަރަހައްދުގައި ހަލަބޮލިކަމާއި ނުތަނަވަސްކަން އުފެއްދުމަށް ގެންގުޅޭ އުކުޅެއް ކަމަށެވެ. އަދި ޣައްޒާގައި ތިބި ފަލަސްތީނު ރައްޔިތުން މި ޕްލޭންތައް ފާސްކުރަން ފުރުސަތެއް ނުދޭނެ ކަމަށް ވެސް ބުނެފައިވެއެވެ.

އެމެރިކާގެ ކޮންގްރެސްވުމަން ރާޝިދާ ތަލައިބު ވެސް ވަނީ ޓްރަމްޕްގެ ބަޔާންތަކަށް ފާޑުކިޔާފައެވެ. ތަލައިބު ވިދާޅުވެފައިވަނީ ޓްރަމްޕް ފާޅުގައި ގޮވާލައްވަމުން ގެންދަވަނީ ޖެނޯސައިޑަލް ހަނގުރާމައިގެ ކުށްވެރިއެއްގެ ކައިރީގައި ތިއްބަވައިގެން ނަސްލު ނައްތާލުމަށް ކަމަށެވެ.