ކުރީ ސަރުކާރުން މަސްވެރިކަމުގެ ބާވަތްތައް ގަތުމަށް ގެނައި ބަދަލުތަކުގެ ސަބަބުން ޖެހިގެން އައި އަހަރުގެ ޢާމްދަނީއިން ވަރަށް ބޮޑަށް އޭގެ އަސަރު ފެނިއްޖެއެވެ.

ތަފާސް ހިސާބުތަކުން ދައްކާ ގޮތުގައި އޭގެ ނަތީޖާއެއްގެ ގޮތުން އޯގަސްޓު މަހާއި ހަމައަށް، މަސް އެކްޕޯޓް ކޮށްގެން ލިބުނު އާމްދަނީ ވަނީ 59.5 މިލިއަން އެމެރިކާ ޑޮލަރަށް ދަށްވެފައެވެ.

2023 ވަނަ އަހަރަށް ބަލާއިރު، މި މުއްދަތުގައި ދިވެހި މަސް ބޭރުކޮށްގެން ޤައުމަށް 108.5 މިލިއަން އެމެރިކާ ޑޮލަރު ލިބިފައި ވެއެވެ.

މިދިޔަ އަހަރުގެ މާރިޗު މަހު، މަސް އެކްސްޕޯޓު ވަނީ ފެބްރުއަރީ މަހާއި އަޅާބަލާއިރު 38 އިންސައްތައިން ދަށްވެ، 3.8 ހާސް މެޓްރިކް ޓަނަށް ވެއްޓިފައެވެ.

ކުރީ ސަރުކާރުން ވަނީ މާކެޓް ވެލިއުގައި އުޅޭ އަގަށް ވުރެ ބޮޑު އަގެއްގައި މަސްވެރިންގެ އަތުން މަސް ގަނެފައެވެ. މީގެ ސަބަބުން މަސް ޕްރޮސެސިންގ އަށް ކުރާ ހޭދަ ބޮޑުވެ، ޤައުމުގެ ޢާމްދަނީ އަށް ލިބެންޖެހޭ އެތައް މިލިއަން ޑޮލަރެއް ގެއްލިފައިވާކަން ފާހަގަ ކުރެވެއެވެ. ސަރުކާރުން މާކެޓް ރޭޓަށް ވުރެ ބޮޑު އަގުގައި މަސްވެރިންގެ އަތުން މަސް ގަތީ ރިޔާސީ އިންތިޚާބު އެމްޑީޕީއަށް ކާމިޔާބު ކުރުމަށެވެ.

މަސް އެކްސްޕޯޓު ދަށްވުމުގެ ސަބަބުން ވިޔަފާރީގެ ދަރަނި ވަނީ އިތުރުވެފައެވެ. 2024 ވަނަ އަހަރުގެ ފުރަތަމަ ހަ މަސްދުވަހު، ވިޔަފާރީގެ ދަރަނި ވަނީ 1.4 ބިލިއަން ޑޮލަރުން 1.5 ބިލިއަން އެމެރިކާ ޑޮލަރަށް އިތުރުވެފައެވެ.

މި ސަރުކާރުން ވެރިކަމާއި ޙަވާލުވިއިރު މަސްވެރިކަމުގެ ސިނާޢަތް ވަނީ މުޅިން ހަލާކުކޮށްފައެވެ. މިފްކޯ ވަނީ މުޅިން ބަނގުރޫޓް ކޮށްފައެވެ. ޤައުމުގެ މަސްވެރިން ބާނާ މަސް ތައިލެންޑުގެ އެޖެންޓު ތަރޑް ޕާޓީ ކުންފުނިތައް މެދުވެރިކޮށް އޭގެއިން ބޮޑެތި ނަފާތައް ބޭރުގެ ކުންފުނިތަކުން ދިޔައީ ނަގަމުންނެވެ.

މި ގޮންޖެހުންތަކަށް އިޖާބަދިނުމުގެ ގޮތުން، ރައީސް ޑރ. މުޢިއްޒުގެ ސަރުކާރުން ވަނީ މަސް ޕްރޮސެސްކުރުމުގެ ޤާބިލުކަން އިތުރުކުރުމަށް ސްޓްރެޓެޖީތަކެއް ތަންފީޒުކުރަން ފަށާފައެވެ. ޅ. ފެލިވަރު، ފ. ނިލަންދޫ އަދި ގދ. ފިޔޯރީގައި އައު ޕްރޮސެސިންގ ފެސިލިޓީތަކެއް އެޅުމުގެ މަސައްކަތް ދަނީ ކުރެވެމުންނެވެ. މި މަސައްކަތްތަކުގެ ސަބަބުން އިތުރު 300 މެޓްރިކް ޓަނުގެ ޕްރޮސެސިންގ ކެޕޭސިޓީ އިތުރުވާނެ ކަމަށް މިނިސްޓަރ ޝިޔާމް ވަނީ ވިދާޅުވެފައިކަން ފާހަގަ ކޮށްލެވެއެވެ.

އަމިއްލަ ކުންފުނިތަކުގެ ބައިވެރިވުމާއެކު، ޖުމްލަ ޕްރޮސެސިންގ ކެޕޭސިޓީ 81,000 މެޓްރިކް ޓަނަށް އަރާނެ ކަމަށް ބެލެވެއެވެ. މި މަސައްކަތްތަކުގެ ސަބަބުން އަހަރަކު މަސް އެކްސްޕޯޓުން ލިބޭ އާމްދަނީ 180 އިން 190 މިލިއަން އެމެރިކާ ޑޮލަރަށް އަރާނެ ކަމަށް ސަރުކާރުން އުންމީދުކުރެއެވެ.