މަސްވެރިކަމުގެ ސިނާއަތް ކުރިއެރުވުމަށާއި މަސްވެރިންނަށް ލިބޭ އާމްދަނީ އިތުރުކޮށްދިނުމަށް ސަރުކާރުން ކުރަމުންދާ މަސައްކަތްތަކުގެ ދަށުން، ރާއްޖޭގެ އެކި ކަންކޮޅުތަކުގައި ޖުމްލަ 99 ކަނދުފަތި މިހާތަނަށް އަޅާފައިވާ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ހާމަކުރައްވައިފިއެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން މަސްވެރިކަމުގެ ދާއިރާއަށް ޚާއްސަ އިސްކަމެއް ދެއްވައިގެން ކުރިއަށްގެންދާ މި މަޝްރޫއަކީ، ކަނޑުގެ ވަސީލަތްތަކުން ލިބޭ ނަފާ އިތުރުކޮށް، މަސްވެރިންނަށް މަސް ހޯދުމުގައި ދިމާވާ ގޮންޖެހުންތަކަށް ދާއިމީ ހައްލެއް ހޯދައިދިނުމަށް ފެށި މުހިންމު މަސައްކަތެކެވެ.

މިހާތަނަށް ގާއިމުކުރެވުނު ކަނދުފަތިތަކުގެ ތަފްސީލަށް ބަލާއިރު، މީގެ ތެރޭގައި ހިމެނެނީ ދޮށީގެ މަސްވެރިކަމަށް ޚާއްސަކޮށްގެން އެޅި 47 ދޮށީ ކަނދުފަތި އަދި ރާއްޖޭގެ ރަށްތަކާ ކައިރީގައި މަޖާލީ މަސްވެރިކަމާއި ރީފް ފިޝިންގް ކުރިއެރުވުމަށް އެޅި 52 ވަދޫ ކަނދުފަތި (ކޮމިއުނިޓީ ބޭސްޑް ފޭޑް) އެވެ.

މިގޮތަށް ދެ ބަޔަކަށް ބަހާލައިގެން ކަނދުފަތިތައް އެޅުމުގެ ސަބަބުން ބޮޑެތި މަސްދޯނިފަހަރުގެ އިތުރުން، އާންމު ދިރިއުޅުމުގެ ބޭނުންތަކަށާއި މުނިފޫހިފިލުވުމަށް މަސްވެރިކަން ކުރާ ފަރާތްތަކަށްވެސް ވަރަށް ބޮޑު ލުއިފަސޭހަކަމެއް ލިބިގެންދާނެއެވެ. މީގެ އިތުރުން، ކަނދުފަތިތަކުގެ ނެޓްވޯކް ފުޅާވުމުން މަސްވެރިން މަސް ހޯދުމަށް ކުރަންޖެހޭ ދަތުރުތައް ކުރުވެ، އުޅަނދުފަތްތަކުގެ ތެލުގެ ޚަރަދު ވަރަށް ބޮޑަށް ކުޑަކުރެވިގެންދާނެއެވެ.

ކަނދުފަތި އެޅުމުގެ މަސައްކަތްތައް އިތުރަށް ހަރުދަނާކުރުމަށްޓަކައި، މިހާރު ހުޅުމާލޭގައި ހުރި ކަނދުފަތި ސެންޓަރުގެ އިތުރުން ރާއްޖޭގެ އުތުރާއި ދެކުނުގައި 2 އައު ކަނދުފަތި ސެންޓަރު ގާއިމުކުރުމުގެ މަސައްކަތް ސަރުކާރުން ދަނީ ކުރަމުންނެވެ. މީގެ ތެރެއިން އުތުރުގެ ސެންޓަރު ގާއިމުކުރުމަށް ހަމަޖެހިފައިވަނީ ށ. ފުނަދޫގައެވެ. މި ސެންޓަރުތައް ވުޖޫދަށް އައުމުން، ކަނދުފަތިތަކަށް ދިމާވާ މައްސަލަތައް އަވަހަށް ހައްލުކޮށް، މަރާމާތުގެ މަސައްކަތްތައް މަރުކަޒީ ނޫން ގޮތަކަށް، އަތޮޅުތަކާ ކައިރިން އަވަސް މިނެއްގައި ކުރިއަށް ގެންދިއުމުގެ މަގު ފަހިވެގެންދާނެ ކަމަށް މަސްވެރިކަމާ ބެހޭ ވުޒާރާއިން ވިދާޅުވެއެވެ.