ތިނަދޫ ސިޓީގައި އިމާރާތް ކޮށްފައިވާ 200 ހައުސިން ޔުނިޓަށް ކުރިމަތިލުމަށް އެ ކައުންސިލުން ކުރި އިޢުލާން ބާޠިލުކުރުމަށް، އިމާރާތްކުރުމާއި، ގެދޮރުވެރިކަމާއި ބިނާވެށި ބެހޭ ވުޒާރާއިން އަންގައިފިއެވެ.

އެ ވުޒާރާގެ ޑެޕިއުޓީ މިނިސްޓަރު ހަސަން ވިސާލް ސޮއިކުރައްވައި ތިނަދޫ މޭޔަރު ސައުދު އަލީއަށް ފޮނުއްވި ސިޓީއެއްގައި ވިދާޅުވެފައިވަނީ، ތިނަދޫގައި އިމާރާތް ކުރަމުންދާ 200 ހައުސިން ޔުނިޓަކީ އެ މިނިސްޓްރީގެ ދަށުން ކުރިޔަށްދާ މަސައްކަތެކެވެ. އަދި އެ ޔުނިޓްތައް ދޫކުރުމަށް އިޢުލާންކުރުމުގެ ކުރިން ހައުސިން ޔުނިޓްތައް ދެވޭނެ އުސޫލު ފައިނަލްކުރުމާއި އެޕްލިކޭޝަންގެ މަރުޙަލާ ކުރިޔަށް ގެންދަންވާނީ މިނިސްޓްރީގެ އިރުޝާދުގެ ދަށުން ކަމަށް ވެސް ސިޓީގައި ބަޔާންކޮށްފައި ވެއެވެ.

ތިނަދޫ ސިޓީ ކައުންސިލުން މި ހައުސިން ޔުނިޓްތަކަށް ކުރިމަތިލުމަށް އެދި އިޢުލާން ކޮށްފައި ވަނީ 29 ޖެނުއަރީ 2025 ގައެވެ. ނަމަވެސް މިނިސްޓްރީގެ ހުއްދަ ނެތި މި އިޢުލާން ކޮށްފައި ވާތީ، ހައުސިން ޔުނިޓްތައް ލިބޭ ފަރާތްތައް ހޯދުމަށް އިޢުލާން ކުރުމަށް ބޭނުންވާ އުސޫލު އެންޑޯސްކުރުމަށް މިނިސްޓްރީއަށް ފޮނުވުމަށް ވަނީ ކައުންސިލަށް އަންގާފައެވެ.

މި ހައުސިން ޔުނިޓްތަކަކީ 540 މިލިއަން ރުފިޔާގެ މަޝްރޫޢުއެއްގެ ދަށުން އިމާރާތް ކުރަމުންދާ ޔުނިޓް ތަކެކެވެ. މި މަސައްކަތް 2022 ވަނަ އަހަރުގެ އޮކްޓޯބަރު މަހު ހަވާލުކޮށްފައި ވަނީ ސިއެރާ ކޮންސްޓްރަކްޝަން އާއި ސްޓަ ކޮންސްޓްރަކްޝަންގެ ޖޮއިންޓް ވެންޗަރ އާއެވެ.

ކޮންމެ ހައުސިން ޔުނިޓަކީ 700 އަކަފޫޓުގެ ޖާގައިގައި ދެ ފަންގިފިލާގެ ރޯހައުސް ތަކެކެވެ. މި ޔުނިޓް ތަކުގައި ތިން ކޮޓަރި، ތިން ފާޚާނާ، ސިޓިންރޫމް، ކާގެ، ބަދިގެ، ލޯންޑްރީ އަދި ގުދަނެއް ހިމެނެއެވެ. އަދި މި ސަރަހައްދުގައި ޕާކަކާއި ވެހިކަލް ޕާކިން ޒޯނެއް ގާއިމުކުރުމަށް ވެސް ވަނީ ހަމަޖެހިފައެވެ