ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހއ. އަތޮޅަށް ކުރައްވަމުން ގެންދަވާ ދަތުރުފުޅުގެ ފަހު މަންޒިލަކަށް މިއަދު ހއ. އުލިގަމަށް ވަޑައިގެންފިއެވެ. އުލިގަމަށް ވަޑައިގަތުމުން އެމަނިކުފާނަށް އެ ރަށުން ވަނީ ރަތްދޫލައިގެ މަރުޙަބާއެއް ދަންނަވާފައެވެ.
މި ދަތުރުފުޅުގައި ރައީސުލްޖުމްހޫރިއްޔާ އުލިގަމު ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީ އަދި ރަށުގެ މުއައްސަސާތަކުގެ އިސް ވެރިންނާ ބައްދަލުކުރައްވާނެއެވެ. މީގެ އިތުރުން ރަށުގެ ރައްޔިތުންނާއި ވެސް ބައްދަލުކުރެއްވުމަށް ހަމަޖެހިފައިވެއެވެ.
އުލިގަމުގައި ރައީސް ކުރައްވާ މުހިންމު މަސައްކަތްތަކުގެ ތެރޭގައި އެ ރަށުގެ އައު ކައުންސިލް އިމާރާތުގެ ބިންގާ އެޅުމާއި، ރަށުގައި ބޭންކިންގ ޚިދުމަތް ދިނުމަށްޓަކައި އޭޓީއެމް ހެދުމުގެ މަސައްކަތް ކައުންސިލާއި ހަވާލުކުރުން ހިމެނެއެވެ.
ރައީސުލްޖުމްހޫރިއްޔާގެ މި ދަތުރުފުޅުގައި ހއ. އަތޮޅުގެ 10 ރަށަކަށް ވަނީ ވަޑައިގެންފައެވެ. މި ދަތުރުފުޅުގައި ރައީސް ވަނީ އެ އަތޮޅުގެ ތަފާތު ރަށްރަށުގެ ރައްޔިތުންނާއި ބައްދަލުކުރައްވައި، އެ ރަށްރަށުގެ ތަރައްޤީއާއި ގުޅޭ މުހިންމު މަޝްރޫޢުތަކެއް ފައްޓަވާފައެވެ.
އުލިގަމަށް ވަޑައިގެންނެވުމުގެ ކުރިން އެމަނިކުފާނު މިއަދު ވަޑައިގެންނެވީ މޮޅަދޫ އަށެވެ. މޮޅަދޫގެ ތަރައްޤީގެ މަސައްކަތްތަކަކީ، ހަމަ އެންމެ ބޮޑު ރަށުގެ ތަރައްޤީއެކޭ އެއްގޮތަށް މުހިންމު ކަންތައްތަކެއް ކަމަށް އެމަނިކުފާނު ވިދާޅުވިއެވެ. އަދި ކޮންމެ ރައްޔިތެއް ވެސް ހަމަހަމަވާނެކަން ތަކުރާރު ކުރައްވައި، އާބާދީގެ ގޮތުން ކުޑަ ރަށެއް ކަމުގައި ވިޔަސް އަދި އެންމެ ބޮޑެތި އާބާދީތައް ކަމުގައި ވިޔަސް، ދިވެހި ރައްޔިތުން ވާނީ ހަމަ ދިވެހި ރައްޔިތުންނަށް ކަމުގައި ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ޤާނޫނުއަސާސީގައި ބަޔާންކޮށްފައިވާ ހުރިހާ ޙައްޤުތަކެއް ހުރިހާ ރައްޔިތުންނަށް ވެސް ލިބިދޭންޖެހޭނެ ކަމުގައި ވިދާޅުވެ، އެކަން އެމަނިކުފާނުގެ ފަރާތްޕުޅުން ކޮށްދެއްވާނެ ކަމުގައި ވިދާޅުވިއެވެ.
ރައީސުލްޖުމްހޫރިއްޔާގެ މި ދަތުރުފުޅަކީ އަތޮޅުގެ ރައްޔިތުންގެ ކަންބޮޑުވުންތަކާއި އުންމީދުތައް އަޑުއެއްސެވުމަށާއި، އަތޮޅުގެ ތަރައްޤީއަށް ބޭނުންވާ މުހިންމު މަޝްރޫޢުތައް ފެއްޓެވުމަށް ކުރެއްވި ދަތުރުފުޅެކެވެ.
