ތިލަދުންމަތީ އުތުރުބުރީ މޮޅަދޫގެ އާބާދީ ކުޑަނަމަވެސް، އެންމެ ބޮޑެތި އާބާދީތަކާއި އެއްވަރަށް ތަރައްްޤީ ކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މޮޅަދޫގެ ރައްޔިތުންނާއި ބައްދަލުކުރައްވައި މިއަދު ދެއްކެވި ވާހަކަފުޅުގައެވެ. މޮޅަދޫއަކީ 412 މީހުންގެ އާބާދީއެއް ދިރިއުޅެމުންދާ ރަށެކެވެ.

ރައީސް ވިދާޅުވީ މޮޅަދޫގެ އާބާދީ ކުޑަނަމަވެސް، އެހެން ކުދި ރަށްތަކޭ ވެސް އެއްފަދައިން އެންމެ ބޮޑު އާބާދީތަކުގެ ރައްޔިތުންނާއި މޮޅަދޫ މީހުން ވެސް ހަމަހަމަ ކަމަށެވެ. އަދި އެ ރައްޔިތުންނަށް ވެސް ހުރިހާ ހައްގުތަކާއި ޚިދުމަތްތައް މުހިންމުކަމަށް ވިދާޅުވިއެވެ. ރައީސް ވަނީ މޮޅަދޫގެ ރައްޔިތުން އުންމީދުކުރާ ގޮތަށް ވަރަށް އިސްކަންދީގެން ބާރު ސްޕީޑުގައި ކަންކަން ކުރުމަކީ ސަރުކާރުގެ ސިޔާސަތުކަމަށް ހާމަކުރައްވާފައެވެ.

ރައީސް ވަނީ މޮޅަދޫގައި ބައެއް މަޝްރޫޢުތައް ހުއްޓިފައި ހުރިކަން ފާހަގަ ކުރައްވާފައެވެ. އޭގެ ތެރޭގައި ފެނާއި ނަރުދަމާ މަޝްރޫޢު ހިމެނެއެވެ. މި މަޝްރޫޢު 2021 ވަނަ އަހަރު ފެށުނު ނަމަވެސް މިހާރު އޮތީ މަޑުޖެހިފައެވެ. ރައީސް ވަނީ މި މަޝްރޫޢު އަވަސްކޮށް ނިންމައިދެއްވާނެ ކަމުގެ ޔަޤީންކަން ދެއްވާފައެވެ.

މީގެ އިތުރުން، ރައީސް ވަނީ މޮޅަދޫގައި ތަޢުލީމީ ދާއިރާއާއި ސިއްޙީ ދާއިރާގެ މައްސަލަތައް ހައްލުކޮށްދޭނެ ކަމަށް ވިދާޅުވެފައެވެ. އެގޮތުން ސްކޫލްގެ އައު މަޝްރޫޢު ނިންމުމާއި، ސިއްޙީ ދާއިރާއަށް ވަސީލަތްތައް ހޯދައިދިނުން ހިމެނެއެވެ.

ކުނީގެ މައްސަލައަށް ހައްލު ހޯދައިދިނުމާއި، ކުޅިވަރުގެ ވަސީލަތްތައް ޤާއިމްކުރުމަށް ވެސް ރައީސް ވަނީ ވަޢުދުވެވަޑައިގެންފައެވެ. އެގޮތުން ފިޓްނަސް އެންޑް ރެކްރިއޭޝަން ސެންޓަރެއް، ފުޓްސަލް ދަނޑެއް އަދި ވޮލީ ކޯޓެއް ޤާއިމްކޮށްދޭނެ ކަމަށް ވިދާޅުވިއެވެ.

ރައީސް ވަނީ މޮޅަދޫގެ ތަރައްޤީގެ ގިނަ މަޝްރޫޢުތައް މިއަހަރު ކުރިއަށްގެންދަވާނެކަމުގެ ފުރިހަމަ ޔަޤީންކަން ރައްޔިތުންނަށް ދެއްވާފައެވެ. މިއީ އާބާދީ ކުޑަ ރަށްތަކަށް ވެސް ހަމަހަމަ ތަރައްޤީ ގެނެސްދިނުމަށް ސަރުކާރުން ކުރާ މަސައްކަތުގެ ބައެއް ކަމަށް ރައީސް ވިދާޅުވިއެވެ.