ބޭރު ފައިސާ މާރުކުރުމުގެ ޤާނޫނުގެ ދަށުން މިދިޔަ މަހެއްހާ ދުވަހުގެ ތެރޭގައި 25 މިލިޔަނަށްވުރެ ގިނަ ޑޮލަރު ރިސޯޓުތަކުން މާރުކޮށްފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވީ މިރޭ ހއ. ހޯރަފުށީގައި ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.
ބޭރު ފައިސާއާއި ބެހޭ ޤާނޫނަށް ޢަމަލުކުރަން ފަށާފައިވަނީ މިމަހުގެ 1 ވަނަ ދުވަހުން ފެށިގެންނެވެ. މި ޤާނޫނުގެ ދަށުން ބޭރުފައިސާގެ އާމްދަނީ ލިބޭ ވިޔަފާރިތަކުން އެ ފަރާތްތަކަށް ލިބޭ އާމްދަނީ ބޭންކުތަކަށް މާރުކުރަން ޖެހެއެވެ. މި ޤާނޫނު އެކުލަވާލާފައި ވަނީ ބޭރު ފައިސާގެ ދަތިކަން ހައްލު ކުރުމަށެވެ.
ރައީސް ވިދާޅުވީ، ގިނަ ރިސޯޓުތަކުން މި ޤާނޫނަށް ތަބާވެ ޢަމަލުކުރަމުންދާ ކަމަށެވެ.
Advertisement
"އަޅުގަނޑަށް ގަވަރުނަރު ދީފައިވާ އަޕްޑޭޓުގައި މިދިޔަ ހޯމަދުވަހުގެ ނިޔަލަށް 25 މިލިޔަނަށްވުރެ ގިނަ ޑޮލަރު މާރުކޮށްފައިވޭ. އެ ޤާނޫނު ރަނގަޅަށް ތަންފީޛުކޮށް އެއްވެސް މީހަކަށް އިސްތިސްނާ ނުދޭނަން. އެ ޤާނޫނުގެ ދަށުން ކޮންމެ ފަރާތެއް ވެސް ޖެހޭނީ އެގޮތަށް ޢަމަލު ކުރަން." ރައީސް ވިދާޅުވިއެވެ.
ރައީސް އިތުރަށް ވިދާޅުވީ މި ޤާނޫނު ތަންފީޛު ވުމުން ރައްޔިތުންނާއި ސަރުކާރަށް ފަސޭހަތަކެއް ލިބިގެންދާނެއެވެ. އަދި ކުރިއަށް އޮތް އަހަރު ގިނަ ކަންކަން ރައްޔިތުންނަށް ފަހިވާނެކަމަށާއި، ޚާއްޞަކޮށް ރާއްޖެއިން ބޭރުގައި ދިރިއުޅޭ ދިވެހިންނާއި ކިޔަވާ ކުދިންނަށް ފައިދާ ކުރާނެ ކަމަށް އެމަނިކުފާނު ވިދާޅުވިއެވެ.
ފާއިތުވި އަހަރަކީ އިޤްތިޞާދީ ދަތި އުނދަގޫތަކާއި ކުރިމަތިލި އަހަރެއް ކަމަށް ފާހަގަ ކުރައްވަމުން، ރައީސް ވިދާޅުވީ އެމަނިކުފާނު ވަޢުދުވެވަޑައިގެންނެވި ގޮތަށް މިހާތަނަށް ފައިސާ ޗާޕުކޮށްފައި ނުވާނެކަމަށެވެ. އެކަން ނުކުރީ އިތުރަށް ރާއްޖޭގެ އިޤްތިޞާދު ހަލާކުވިޔަ ނުދިނުމަށް ކަމަށް ވެސް ރައީސް ވިދާޅުވިއެވެ.
ބޭރު ފައިސާ މާރުކުރުމުގެ ޤާނޫނުގެ މަޤްޞަދަކީ، ރާއްޖޭގައި ބޭރު ފައިސާއިން ކުރެވޭނެ މުޢާމަލާތްތައް ކަނޑައަޅައި، ބޭރު ފައިސާ އެތެރެކޮށް ބޭނުންކުރުމާއި ގެންގުޅުމާއި އަދި ޖަމާކޮށް މާރުކުރުމާއި ގުޅޭ އުސޫލުތައް ކަނޑައަޅައި ހިންގުމަށް ބޭނުންވާ ޤާނޫނީ އޮނިގަނޑެއް އެކުލަވާލުމެވެ. މި ޤާނޫނުގެ ދަށުން އިސްތިސްނާވާ މުޢާމަލާތްތައް ފިޔަވައި އެހެން ހުރިހާ މުޢާމަލާތްތައް ކުރަން ޖެހޭނީ ދިވެހި ރުފިޔާއިން ކަމަށް ވަނީ ބަޔާންކޮށްފައެވެ.
