ހުވަދު އަތޮޅު ދެކުނުބުރީ ތިނަދޫ ސިޓީގައި ދިރިއުޅޭ އަދި އެ ސިޓީއަށް ހިޖުރަކުރަން ބޭނުންވާ ފަރާތްތަކަށް ބޯހިޔާވަހިކަން ފޯރުކޮށްދިނުމަށްޓަކައި، ސަރުކާރުން ޢިމާރާތް ކުރަމުންދާ 200 ހައުސިންގ ޔުނިޓަށް އެދި ހުށަހެޅުމުގެ ފުރުޞަތު މިއަދުން ފެށިގެން ހުޅުވާލައިފިއެވެ.

ތިނަދޫ ސިޓީ ކައުންސިލްގެ އިދާރާއިން ކުރި އިޢުލާނެއްގައި ބުނެފައިވާ ގޮތުގައި، މި ފުރުޞަތު ހުޅުވާލާފައި ވަނީ މިއަދު މެންދުރުފަހު 13:00 އިން ފެށިގެން 30 އޭޕްރީލްގެ 14:00 އާއި ހަމައަށެވެ. ފޯމު ހުށަހެޅުމަށް ހަމަޖެހިފައި ވަނީ ތިން ކެޓަގަރީއަކަށް ބަހާލައިގެންނެވެ. އެއީ:

1. ކެޓަގަރީ A: ތިނަދޫ ރައްޔިތުންނަށް ޚާއްޞަ ކެޓަގަރީ

2. ކެޓަގަރީ B: ތިނަދޫ ދަފްތަރު އަދި ތިނަދޫ ސިޓީއަށް ރަށްވެހިކަން ބަދަލުކޮށްފައިވާ ފަރާތްތަކުގެ ކެޓަގަރީ

3. ކެޓަގަރީ C: ތިނަދޫގެ އާބާދީ އިތުރުކުރުމުގެ ސިޔާސަތުގެ ދަށުން ތިނަދޫ ސިޓީއަށް ހިޖުރަކުރަން ބޭނުންވާ ފަރާތްތަކަށް ޚާއްޞަ ކެޓަގަރީ

އިޢުލާނުގައިވާ ގޮތުން، ފޯމު ހުށަހެޅުމަށް ހަމަޖެހިފައި ވަނީ ތިނަދޫ ސިޓީ ކައުންސިލްގެ ހައުސިންގ ޕޯޓަލް www.housing.thinadhoo.gov.mv މެދުވެރިކޮށެވެ. ހައުސިންގ ޔުނިޓް ދޫކުރުމަށް ހަމަޖެހިފައިވާ އުސޫލު ދިވެހި ސަރުކާރުގެ ގެޒެޓުންނާއި، ތިނަދޫ ސިޓީ ކައުންސިލްގެ ހައުސިންގ ޕޯޓަލްއިން ފެންނަން ހުންނާނެ ކަމަށް ކައުންސިލުން ބުނެފައިވެއެވެ.

މީގެ އިތުރުން، ފޯމާއި ގުޅޭ ގޮތުން ހުށަހެޅޭ ޝަކުވާތައް ބަލައިގަތުމާއި، އެ ޝަކުވާތަކަށް ދެވޭ ޖަވާބުތަކާއި، އަދި ކަމާއި ގުޅޭ ފަރާތްތަކަށް ލިބިފައިވާ ޕޮއިންޓްތަކުގެ ތަފްޞީލް ފެންނަން ހުންނާނީ އޮންލައިން ޕޯޓަލް މެދުވެރިކޮށް ކަމަށް ވެސް ކައުންސިލުން ވަނީ ހާމަކޮށްފައެވެ.