މާރަންދޫ ސިއްޙީ މަރުކަޒަށް މުވައްޒަފުން އިތުރުކޮށް ލެބޯޓްރީއެއް ޤާއިމުކުރުމުގެ މަސައްކަތް ކުރިއަށް ގެންދަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މިއަދު ހއ. މާރަންދޫއަށް ކުރެއްވި ދަތުރުފުޅުގައި އެރަށުގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުންނެވެ.
ރައީސް ވިދާޅުވީ ކުރީ ސަރުކާރުން ފަށާފައިވާ ބަނދަރު ހެދުމުގެ މަޝްރޫޢާއި، ސްކޫލުގެ ކްލާސްރޫމް އެޅުމުގެ މަސައްކަތް ހިމެނޭ ގޮތަށް މިއަހަރުގެ ތެރޭގައި އެކި މަސައްކަތްތައް ކުރިއަށް ގެންދަވާނެ ކަމަށެވެ.
ރައީސް ވިދާޅުވީ ކުރީ ސަރުކާރުން ބަޖެޓު ކުޑަކޮށް، އެއް ކުންފުންޏަކަށް ގިނަ މަޝްރޫޢުތަކެއް ހަވާލުކޮށްފައި އޮތުމުން މި މަސައްކަތްތައް ނުނިމި ލަސްވެފައިވާ ކަމަށެވެ. ނަމަވެސް މި މައްސަލަތަކަށް ހައްލު ހޯދައި، ނުނިމި ހުރި މަޝްރޫޢުތައް ނިންމަވައިދެއްވާނެ ކަމަށް އެމަނިކުފާނު ވިދާޅުވިއެވެ.
މީގެ އިތުރުން މާރަންދޫގެ ފުޓްބޯޅަ ދަނޑުގައި ލައިޓް ޖެހުމާއި، އައު ފުޓްސަލް ދަނޑެއް ޤާއިމުކުރުމާއި، ވޮލީ ކޯޓެއް އެޅުމާއި، ސްކޫލުގައި މަލްޓިޕާޕަސް ހޯލެއް ތަރައްޤީކުރުމުގެ އިތުރުން ރަށްގިރުމުގެ މައްސަލައަށްވެސް ހައްލު ހޯއްދަވައިދެއްވާނެ ކަމުގެ ޔަޤީންކަން ރައީސް ދެއްވިއެވެ.
ރައީސް ވިދާޅުވީ މިއަހަރުގެ ތެރޭގައި ފަށާ މަޝްރޫޢުތައް އަންނަ އަހަރުގެ ތެރޭގައި ނިންމާލެވޭނެ ކަމަށެވެ. އަދި މާރަންދޫގައި އެކި ދާއިރާތަކުން ހުރި މައްސަލަތައް ހައްލުކޮށްދެއްވުމުގެ ޢަމަލީ މަސައްކަތް ފެށިގެންދާ މަންޒަރު މިއަހަރުގެ ތެރޭގައި ފެނިގެންދާނެ ކަމަށްވެސް އެމަނިކުފާނު ވިދާޅުވިއެވެ.
