ރާއްޖޭގެ އެކި ރަށްރަށަށް ކުރައްވާ ދަތުރުތަކަކީ ބޭކާރު ޚަރަދެއް ނޫން ކަމަށާއި، އެ ދަތުރުތަކުގެ މަޤްޞަދަކީ ރަށްރަށުގެ މައްސަލަތަކަށް ހައްލު ހޯދުން ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވެފައި ވަނީ ހއ. އަތޮޅަށް ކުރައްވަމުންދާ ދަތުރުފުޅުގައި މިއަދު ހއ. މާރަންދޫ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުންނެވެ.
އީސްގެ އަތޮޅުތަކަށް ކުރައްވާ ދަތުރުތަކަކީ ބޭކާރު ޚަރަދުތަކެއް ކަމަށް ބުނެ ސޯޝަލް މީޑިއާގައި ފަތުރަމުންދާ ވާހަކަތަކަށް ރައްދު ދެއްވުމުގެ ގޮތުން ރައީސް ވިދާޅުވީ ރަށްރަށުގައި ބާއްވާ ޖަލްސާތަކުގެ މަޤްޞަދަކީ ކަންކަން ހައްލުކުރުން ކަމަށެވެ. އަދި ވަޒީރުންނާއެކު ރަށްރަށަށް ވަޑައިގަންނަވަނީ އަވަސް ސްޕީޑެއްގައި ކަންކަން ނިންމައި، ނަތީޖާ ނެރުމަށް ކަމަށް ވިދާޅުވިއެވެ.
"ޚަރަދު ބޭކާރުވާނީ ހަޤީޤަތުގައި ލަސްވެގެންގޮސް ގެއްލިގެންދާ ދުވަސްތަކުން އެ ލިބޭ ގެއްލުން. އެއީ މާ ބޭކާރުވާނެ," ރައީސް ވިދާޅުވިއެވެ.
ރައީސް އިތުރަށް ވިދާޅުވީ މާލޭގައި އަރާމުގައި ތިބުމުގެ ބަދަލުގައި، ވަޒީރުންނާއެކު ރަށްރަށަށް ވަޑައިގެން، ކައުންސިލްތަކާއި މުއައްސަސާތަކުގެ ޒިންމާދާރު ވެރިންނާއި އެކު މަޝްވަރާކޮށް، މައްސަލަތަކަށް ހައްލު ހޯދުމަށް މަސައްކަތް ކުރެއްވުމަކީ މުހިންމު ކަމެއް ކަމުގައެވެ. މި ދަތުރުތަކުގައި ރަށްރަށުގެ ތަރައްޤީ އަށް ޓަކައި ސީރިއަސް މަސައްކަތްތަކެއް ކުރައްވާ ކަމަށް ވެސް ރައީސް ވިދާޅުވިއެވެ.
